Në një intervistë për mediat, kryetari i Partisë Agrare, Agron Duka, i është bashkuar idesë së kryetarit të LZHK-së, Dashamir Shehi, për të krijuar një pol opozitar për të nxjerrë kandidatë të përbashkët në 6 bashkitë ku do të zhvillohen zgjedhjet.
Duka është shprehur se partia që ai drejton ka vendosur që të jetë aktor në zgjedhje, por duke qenë se afati është i shkurtër, për ta kandidimi më vete është aventurë e pamundur dhe për këtë ai është i gatshëm që të japë kontributin e vetë në koalicion.
“Ne kemi bërë një takim me kryesinë e PAA-së dje pasdite dhe varianti për të dalë me siglën tonë na duket pak sa aventuresk. Një parti e vogël si e jona nuk është gati që të nxjerrë kandidatura kaq shpejt. Edhe dekreti i Presidentit ishte në një kohë shumë të kufizuar. Ne do jemi aktorë në zgjedhje me opozitën. Në një situatë të tillë ku PD-ja hynë e përçarë, natyrisht nuk janë shumë pozita komode për ne se kë do mbështesim. Do ishte mirë që të dilnim me një kandidaturë. Ne sugjerojmë që të dalim me një kandidaturë të përbashkët. Kjo do mundësonte që të fitonim ndonjë nga bashkitë. Nëse hyjmë të përçarë, mundësitë janë jo të pamundura, por janë më pak të mundshme”, tha Duka.
Duka ka konfirmuar se deri më tani ka pasur një takim me ish-Kryeministrin Sali Berisha, ndërsa nuk është kontaktuar ende nga kryedemokrati Basha për zgjedhjet lokale. Megjithatë, shprehet se në takimin me liderin historik të PD-së nuk ka konkluduar në vendimmarrje.
“Me z. Basha nuk jemi takuar, s’kemi asnjë lloj ftese. Gjasat janë se nuk do të ketë takim, sepse për një javë fillojnë regjistrimet. Ndërsa nga z. Berisha kemi pasur. Unë e kam takuar z. Berisha. Nuk kam konkluduar në asnjë lloj vendimi. Ka qenë një takim informal për t’u konsultuar ndërmjet nesh. Unë kam shprehur mendimet që kandidimi së bashku do ishte më i mirë. Ndërsa Berisha ka thënë ato që janë publikisht” – vijoi Duka.
Gjithashtu mësohet se kryedemokrati Basha ka nisur komunikimet me bazën për të gjetur një emër që maksimalizon votat. Ndërkohë që pritet që të ketë takime edhe me disa prej aleatëve. Ajo që është e qartë deri më tani është fakti se PD-ja dhe LSI-ja nuk janë më në aleancë me njëra-tjetrën, si para zgjedhjeve të 25 prillit.
