Policia greke ka arrestur një grup kriminal të trafikut të kanabisit, dy shtetas grekë, përkatësisht 36 dhe 22 vjeç dhe një 26 vjeçar shqiptar. Ata ishin drejtues të një organizate që merrej me shpërndarjen e lëndëve narkotike. Pjesë e kësaj organizate janë edhe 34 anëtarë të tjerë, shtetas grekë dhe të huaj.
Operacioni për kapjen e tyre përfundoi gjatë ditës së djeshme nga Departamenti i Sigurisë në Argostoli. Hetimet e policisë bëjnë me dije se, trafiku është kryer duke nisur nga fillimi i këtij viti dhe organizata ka trafikuar sasi të mëdha kanabisi në Kefalonia. Nga operacioni policor i deri tanishëm janë sekuestruar rreth 1 kg kanabis, 26.925 euro, peshore elektronike, celularë, armë,dy makina dhe eksploziv. Hetime të mëtejshme priten në vijim për të përcaktuar plotësisht veprimtarinë kriminale të organizatës.
