Nga Luljeta Progni
Asgjë nuk përbën më lajm. Në Shqipëri kanë ndodhur të gjitha. Skandali i zë vëndin skandalit dhe opinioni është krejt i ç’orientuar. Situatë kaotike. Aanalizojmë pesë ditët e fundit, kur lajme të bujshme kanë pasuar njëri-tjetrin me shpejtësi. Nis me kryebashkiakun e dorëhequr Elvis Roshi, i cili dha dorëheqje nga dorëheqja. Një deklaratë paradoksale e tij, pasi vetë kishte konstatuar se ishte dënuar në Itali, përmes avokatëve, dhe po përmes avokatëve të tij konstaton brenda dy ditësh se nuk ishte dënuar. Kështu ai tërhiqet nga dorëheqja. 
Lajmi nuk mbeti gjatë në krye të listës, sepse të tjera lajme zunë vendin kryesor. Ministri i brendshëm, Saimir Tahiri, bëri me dije se kishte paraqitur një padi në prokurori, pasi dyshohej se ishte përgjuar. Në zyrën e tij ishte gjetur një paisje përgjimi. Takimi Rama-Basha do të ishte lajmi tjetër që u prit me kureshtje nga mediat dhe opinioni. Dështimi dhe debatet në grupin parlamentar të kësaj partie për prishje të marrëdhënieve me ndërkombëtarët, ishte gjithashtu lajm i rëndësishëm. Por ky lajmi mori vetëm pak minuta vëmendje.
Prokuroria kishte rezervuar një tjetër bombë, atë të pezullimit të drejtorit të policisë së shtetit. Akuzohet bashkë me vartësit e tij për përfshirje në skandalin e përgjimeve. Pak çaste më pas doli në dritë se vetë ministri i brendshëm mund të jetë nën hetim për këtë çështje dhe pak çaste të tjera më pas, shefi i Interforce largohet nga Shqipëria për këtë skandal.
Ndërkohë janë harruar lajme që kanë ndodhur tani afër fare, jo më shumë se tre javë më parë. Ishte videoskandali i kyebashkiakut socialist, Shukri Xhelili, i cili u shfaq duke kërkuar seks në këmbim të një vendi pune në bashki. Ai lajm ia mori vëmëndjen lajmit për “baronin e drogës” së Ballkanit, Klement Balili. Ishte drejtor Rilindjes në Sarandë. Drejtonte Agjensinë e Transporteve.
Megjithëse ishte shpallur në kërkim nga Interpoli grek, pala shqiptare e pati të pamundur ta arrestojë. Kjo ngjarje është harruar.
Pas këtij lajmi u publikuan vetëdeklarimet e kryebashkiakëve dhe deputetëve. Shumë prej tyre rezultuan të kishin më shumë se një emër. Duke nisur nga kryeministri që e kishte pasur më parë emrin Edvin dhe e kishte bërë Edi për arsye të pashpjeguara e deri tek kryebashkiaku socilaist i Kurbinit që kishte katër emra, për arsye që zyrtarisht ende nuk i dimë.
Në këtë rrëmujë ngjarjesh, ish-guvernatori i Bankës së Shqipërisë, Ardian Fullani, fitoi gjyqin. Kishte paditur Kuvendin dhe Bankën e Shqipërisë për shkarkim të paligjshëm nga detyra dhe për dëmtim të imazhit e shkaktim stresi.
Një situatë ku reagimi është shterruar, sepse s’ka kohë. Ka kaq shumë lajme të bujshme sa nuk ka kohë kush të marrë frymë e të reflektojë. Në Shipëri mund të ndodhë çdo lloj gjëje dhe nuk përbën më lajm. Sa për reagimin qytetar, ska më shpresë. Askush nuk reagon për asgjë, sepse edhe Eljani na doli djalë artist.
