Kryeministri i Kosovës, Albin Kurti, gjatë konferencës së përbashkët me kryeministrin shqiptar, Edi Rama, u ndal te situata e tensionuar në veri të vendit, në afërsi të kufirit me Serbinë.
Ai tha se forcat speciale nuk ndodhen në kufi për të ndërmarrë sulme, por vetëm për të mbrojtur policinë kufitare dhe godinat atje.
Gjithashtu Kurti theksoi se i kanë bërë një ofertë Serbisë, për heqjen e targave të përkohshme nga të dyja palët, por sipas tij, kjo gjë është refuzuar.
“Detyra e forcave është të mbrojnë detyrën kufitare dhe policët kufitarë. Po të mos ishte njësia speciale e Kosovës, policët dhe godinat aty do të ishin në rrezik. Buldozerët nuk janë për të penguar rrugë, por për të sulmuar nëse do të jetë nevoja. Në asnjë pikë kufitare s’ka pasur incident. Ku ka polici të Kosovës nuk ka dhunë, incidente. Policia e Kosovës është tejet profesionale dhe korrekte dhe unë i falenderoj për punën dhe angazhimin që kanë bërë. Ne kemi bërë një ofertë që kemi thënë që sia vlen të kemi targa të përkohshme si Republika e Kosovës dhe e Serbisë. Mirëpo ne kemi thënë që të heqim targat e përkohshme dhe lëvizja të jetë sa më e kollajshme dhe pa vonesë. Po e ritheksoj që njësitë speciale nuk ndodhet për të demonstruar forcë, por për të mbrojtur policët kufitarë dhe pikat kufitare. Unë asnjëherë gjatë këtyre ditëve nuk jam shfaqur me ministrinë e Mbrojtjes, vetëm me ato të Brendshëm. Ndërsa Serbia shkon në kufi me ministrin e saj të Mbrojtjes. Ata që kanë bllokuar rrugët kanë bllokuar veten, qytetarët serbë. Ne jemi këtu për t’ju shërbyer të gjithëve”, tha Kurti.
