Deputetja e PDIU-së ironizon Policinë e Shtetit, pasi u shfaqën të armatosur në protestën e shoqatës “Çamëria”
Deputetja e PDIU-së, Mesila Doda, denoncon policinë e shtetit për sjellje arrogante ndaj protestës së shoqatës “Çamëria” e zhvilluar sot para Ministrisë së Jashtme.
“Policia që duam. Të armatosur në protestë qytetare…më fal, kë po mbronin nga kush????”, shkruan Mesila Doda. Gjatë protestës, pati forca të shumta policore, por ajo që bie në sy është armatosja e tyre. Përmes disa fotografive që përcjell në facebook, Mesila Doda denoncon kështu sjelljen e policisë shqiptare ndaj një proteste qytetare siç ishte ajo e shoqatës “Çamëria”, ndaj ministrit të Jashtëm grek, Nikos Kotzias. Gjatë protestës së sotme, policia dhunoi deputeten Mesila Doda, duke e shtyrë atë me forcë për ta larguar nga protesta. Fotografitë e publikuara nga deputetja Doda, dëshmojnë dhunë të policisë ndaj saj.
Shoqata “Çamëria”, protestoi sot para Ministrisë së Jashtme shqiptare, në kohën kur atje ishte i pranishëm ministri i jashtëm grek, Nikos Kotzias. Protesta u shoqërua me tensione pasi, një deklaratë e Kotzias që akuzon çamët për bashkëpunim me nazizmin, ka shkaktuar reagime të ashpra të turmës.
