“Grabitja nuk ka kombësi. Nuk po flasim për varrezat greke, por për toka të vjedhura”
“Vërtet jemi aq rëndë sa edhe një greku i erdhi keq për ne?”, këtë pyetje ka drejtuar sot në sallën e Kuvendit, deputeti socialist Erjon Braçe. Reagimi i tij erdhi pasi kryetari i PBDNJ-së Vangjel Dule, akuzoi mazhorancën se po e përzë opozitën nga Kuvendi. “Në të gjithë botën opozita joshet të jetë në Kuvend nga mazhoranca. Ju socialistet e përjashtuat dy herë brenda një muaji. Nuk iku, e përjashtuat. Dhe për çfarë, për dhunë verbale thoni. Turp. Ku jetojmë? Ju që ushtroni dhunë reale përjashtoni opozitën për dhunë verbale? Ju nuk doni asnjë që ju kundërshton”, ka thënë Dule.
I ashpër ka qënë reagimi i deputetit socialist Erjon Brace i cili iu kthye edhe debatit pë çështjen çame. “Unë respektoj grekët e lashtë, jo këta grekët e sotëm. Ky nuk foli per grabitjen e tokave të Jugut. Grabitja nuk ka kombësi. Nuk po flasim për varrezat greke, por për toka të vjedhura”, ka thënë Braçe, duke folur pë pronat e popullsisë çame në Greqi. Pak më heret në seancë pati debat mes kryetarit të PDIU-së Idrizi me ministrin e jashtëm Ditmir Bushati. Ata debatuan për zgjidhjen e çështjes çame dhe qëndrimin që do të mbajë pala shqiptare me rastine vizitës së ministrit të jashtëm grek në Tiranë.
