Kreshnik Spahiu është një ndër avokatët më të mëdhenj të Edi Ramës, Kryeministrit të Shqipërisë. Avokatinë dhe përkushtimin e tij ndaj Ramës e shfaq për çdo ditë në studio televizive duke sharë, tallë e përqeshë përfaqësuesit Opozitarë e sidomos krerët Berisha e Basha.
Ditën e fundit para zgjedhjeve deklaroi:
“Do votoni për të mbajtur në politikë Sali Berishën, Ilir Metën, Monika Kryemadhi apo Edi Ramën?”
Dhe shqiptarët e dëgjuan Nikun ish-kuqezi. Votuan Ramën!
U duk se tashmë mori fund, Kresha do të qetësohej… Mirëpo jo.
Një zell e përkushtim i veçantë e ka kapë Kreshnikun këto kohë kundër Sali Berishës. Nisur nga fakti që Berisha u shpall “nongrata” nga Departamenti Amerikan i Shtetit, Kreshniku i përmend nga tre herë në ditë burgun Berishës. Postimet e tij në rrjetet sociale janë të pandalshme, një vrundull urrejtje e ka pushtuar të tërin. E quan “të paburrë”, “gënjeshtar”, “kriminel” dhe plot parashikime që SPAK-u do e burgosë.
Pas çdo parashikimi shkruan :
“Ruajeni këtë mesazh dhe ma tregoni kur të vijë koha”!
Duke u nisur nga kjo sentencë e përsëritur e zotit Spahiu klikova emrin e tij në youtube, të shoh një herë largpamësinë e tij.
Gjeta plot video ku glorifikonte Bashën në kurriz të Ramës por nuk do merrem gjatë me ato. Do ndalem vetëm në dy momente në një intervistë të tij të vitit 2016. Këtu më duhet të theksoj se zoti Berisha i asaj kohe e kishte mbyllur ciklin e tij prej protagonisti politik, pra kishte kaluar të gjithë periudhën për të cilën akuzohet nga DASH-i dhe nga Kreshniku sot. Mirëpo atëherë Kreshniku ishte nostalgjik, i mallëngjyer, gati gati zë-dridhur kur moderatori e pyet nëse është takuar me Sali Berishën këto kohë. Ja përgjigja e Kreshnikut:
“Jo. Me Sali Berishën komunikimi i fundit ka qenë me 09 Maj të vitit 2009 dhe kam 7 vite që nuk komunikoj dhe besoj që ky është një nga avantazhet më të mëdha që ka Edi Rama. Dhe këtë ai e din shumë mirë dhe përfiton. Nëse do vinte një ditë që këta dy njerëz do i shtrëngonin dorën njëri tjetrit për të hedhur pas shumë gjëra, ai njeri nuk do zgjaste 24 orë në pushtet, Edi Rama”
Ja dhe video:
Pra, Kreshniku e mban në kujtesë mesazhin e fundit të Sali Berishës në telefonin e tij siç mbajmë kujtimin e hidhur të një njeriu shumë të shtrenjtë që na ka braktisur dhe me të cilin ëndërrojmë ribashkimin. Duket e ka pa shumë herë atë mesazh përderisa e ka të ngulitur në kokë atë datë. Kaq patetik dhe qesharak e bën mallëngjimi sa deklaron : “Nëse Kreshnik Spahiu dhe Sali Berisha bëhen bashkë Edi Rama rrëzohet për 24 orë”!
Çfarë krimi ka bërë Sali Berisha nga 2016-a e deri sot që Kreshnik Spahiu nuk sheh tek ai një “burrë mbi burra që në bashkëpunim me Kreshën kuqezi do rrëzonte Edi Ramën por një kriminel që meriton burgun dhe që po mban peng PD-në”? Këtë pyetje do të doja t’ia bëja publikisht të parën.
Duke dëgjuar intervistën e Kreshnikut, pak më pas, mbeta edhe më i shokuar. Moderatori e pyet:
“A u surprizuat kur te kolegu Arjan Çani, zoti Berisha ju doli në krah ditën e arrestimit tuaj?”
“Besoj se Sali Berisha tregoi një fisnikëri ashtu siç dhe unë kam treguar që kundërshtarët politkë i sulmoj dhe i kritikoj ashpër, jam opozitari më i fortë kur ata janë në pushtet dhe jam njeriu më fisnik për t’i respektuar kur ata janë në Opozitë. Njerzillëku i një politikani, i një individi, shikohet në trajtimin dhe raportet që vendos me një person kur ai është në pushtet dhe kur ai është në Opozitë. Në gjithë ligjëratën politike timen, në 25 vite, kurrë nuk kam bërë Opozitën e Opozitës dhe jam treguar shumë dinjitoz që me çdo Kryeministër kam mbajtur qëndrim Opozitar. Unë mendoj që qoftë Sali Berisha, Ilir Meta, Fatos Nano e çdokush tjetër, di të vlerësojë karakterin dhe integritetin e një politikani apo Kreshnik Spahiut, kur ata janë në Opozitë dhe i ka rrëshkitë këmba dhe kur janë në pushtet. Kur janë në pushtet të gjithë janë servilë, unë të kam bërë të kundërtën. Kur janë në Opozitë të gjithë të kthejnë shpinën dhe unë kam bërë sërish të kundërtën nga të tjerët.
Ja dhe video:
Pajtohemi të gjithë besoj kur themi që kjo ngjarje ishte një ngjarje e rëndë për zotin Berisha. Ndoshta më e rënda qysh nga hyrja e tij në politikë. Pra, me pak fjalë, jemi bash në momentin kur Kreshniku thotë: “Jam njeriu më fisnik për t’I respektuar kur ata janë në Opozitë”.
Pyetja ime e dytë për Kreshnikun është: Çfarë mendon për këtë deklarim mallëngjyes, moralizues për dinjitetin dhe karakterin të vitit 2016 këto ditë kur Sali Berishës i ka rrëshqitur këmba (po citoj Kreshnikun e atëhershëm)?.
Duket që jo vetëm forma por edhe përmbajtja e z. Spahiu ka ndryshuar fort qysh atëherë…
