Kryetari i Partisë Demokratike për Integrim dhe Unitet, Shpëtim Idrizi thekson se koalicioni opozitar duhet t’i shërbejë qëllimit të përbashkët për të ardhur të pushtet pas zgjedhjeve të 25 prillit.
I ftuar në Top Talk Idrizi tha se është i gatshëm të bashkëpunojë, por është shumë i rëndësishëm mirëbesimi dhe vlerësimi i peshës elektorale të partive në koalicion.
“PDIU i ka filluar negociatat me PD, por më duhet të theksoj përqasjen tonë. E shohim si bashkim të të gjitha partive që kanë një qëllim, në kushtet e mirëbesimit dhe peshës elektorale ndër vite. Të bëjmë një front opozitar përballë ndryshimit të madh që kërkojnë qytetarët.
Unë refuzoj që ta quaj këtë marrëveshje të gjësë së gjallë. Nuk është kështu. E shoh si sinergji dhe koalicion opozitar. Sigurisht që primatin e ka PD…”.
Sipas tij marrëveshja duhej bërë më parë, por ndërhyrja e mazhorancës në Kodin Zgjedhor e kanë vështirësuar punën: “Marrëveshja me opozitën është një marrëveshje që duhej bërë më parë, sot duhet të ishim duke bërë marrëveshje me popullin, por është pasojë e ndryshimeve të njëanshme që iu bënë Kodit Zgjedhor dhe rregullave të lojës. Rama e futi këtë element për të krijuar tension mes nesh.”
Idrizi është i bindur, kur thotë se PDIU nuk do të dalë e pakënaqur nga ky koalicion, por megjithatë thotë se partia që drejton ka shumë rrugëzgjidhje të tjera.
“PDIU, është parti e matur elektoralisht që nga viti 2010. Në bazë të peshës tonë specifike, normal që jam i detyruar të ruaj edhe elektoralin e PDIU-së dhe kauzën e saj. Unë nuk mund ta negocioj PDIU-në edhe qoftë për arsye personale”,- thekson Idrizi.
