Shkencëtari Ugur Sahin, i cili qëndron pas të parës vaksinë COVID-19, e cila i ka kaluar të gjitha testimet klinike, është i bindur se produkti i tij do na e heqë qafe virusin.
Sipas gazetës “The Guardian”, ai thotë se vaksina do i japë fund pandemisë që po e mban botën peng.
Kompania gjermane Biontech dhe gjiganti farmaceutik amerikan Pfizer lajmëruan të hënën se vaksina e tyre ka dalë me sukses në tre fazat e testimit, duke u provuar 90 përqind efektive në pengimin e koronavirusit.
Në intervistën e tij për Guardian, shefi ekzekutiv i kompanisë Biontech, Ugur Sahin tha se ai është optimist.
“Nëse pyetja është a mund ta ndalojmë pandeminë me këtë vaksinë, atëherë përgjigja ime është: po, sepse besoj që edhe mbrojtja vetëm nga infeksionet simptomatike do të ketë efekt të fuqishëm”,- u shpreh ai.
“Ne tani e dimë se kjo vaksinë mund ta mposhtë këtë virus. Vaksina e pengon koronavirusin që të fitojë akses në qelizat tona. Por, edhe nëse virusi ia del të gjejë një mënyrë për të hyrë në trup, atëherë janë qelizat-T do e eliminojnë nga trupi. Ne e kemi stërvitur sistemin imun kaq mirë për këto dy lëvizje mbrojtëse. Tani e dimë se virusi nuk mund të mbrohet ndaj këtyre mekanizmave”.
Sipas tij, efekti mbrojtës i vaksinës do jetë deri në një vit. Ai nuk e përjashton mundësinë që vaksina të merret çdo vit.
Sahin tha se nuk ka asnjë lidhje me politikën lajmërimi për suksesin e vaksinës.
Megjithëse firma e tij tani vlen në bursë mbi 22 miliardë dollarë, ai tha se numrat janë pa rëndësi për të.
Ai rrëfeu që pas suksesit, u ul me të shoqen dhe e festuan me çaj.
/Marrë nga syri.net/
