Po ku janë kryer këto krime? 17 vende, thuhet në dosje, mes të cilave edhe në Shqipëri.
Në dosje thuhet se fushatat e persekutimit kundër kundërshtarëve, përfshirë në komuna të shumta në Kosova janë kryer edhe në Kukës e Has, në veri të Shqipërisë. Po sipas dosjes, krimet për të cilat akuzohet kupola e UÇK-së janë bërë midis marsit 1998 dhe shtatorit 1999.
Por çfarë thuhet konkretisht?
Në dosje ngrihet akuza që të paraburgosurit në këto vendqëndrime në Kosovë dhe në Shqipëri, Kukës e Has janë marrë në pyetje dhe akuzuar, e persekutuar për shoqërim me serbë duke i cilësuar se kanë qenë tradhtarë, spiunë dhe bashkëpunëtorë me autoritetet serbe gjatë luftës.
“Përndjekja u krye në baza politike ose etnike, përfshirë këtu përmes: arrestimeve dhe ndalimeve të paligjshme ose arbitrare, kushteve çnjerëzore në vendet e paraburgimit, zhdukjes me forcë, abuzimit fizik dhe psikologjik, torturave dhe vrasjeve”,- thuhet më tej.
Në dosje përmenden shumë emra, mes të cilëve edhe Sabit Geci për rastin e Kukësit. “Në Kukës midis majit dhe qershorit 1999, disa anëtarë të UÇK-së, përfshirë Sabit Gecin, ndaluan të paktën 20 persona për periudha të ndryshme kohore në ambientet e një ish-fabrike metali në Kukës.
Dokumentet u sekuestruan, ata ishin të lidhur me pranga, mbaheshin nën roje në dhoma të mbyllura me dritare të mbyllura”,- thuhet në dosje. Dokumenti thekson se personat që ishin në shënjestër në vendet e përshtatura, dhunoheshin me shkopinj, shufra metalike, armë, thika, grushte, shkelma, por edhe me djegie.
/ABC/
