Nga Mehmet Elezi*
Serbia po armatoset si nëpër ëndërr. Në vitin 2020 e 2019 e rriti buxhetin ushtarak në rreth 1.14 miliardë dollarë. Afërsisht 43 % më shumë se në 2018. Nuk njoftoi shtypi i bulevardeve. Njoftoi Zëri i Amerikës (10 tetor).
“Po forcojmë ushtrinë për të parandaluar çdo agresor, s’kemi ndërmend të nisim ndonjë konflikt”,- deklaroi presidenti Vuçiç.
Ku ka deklarata, beso të kundërtën, është një thënie e vjetër.
Kush do ta “agresojë” Serbinë, NATO-ja?
Sigurisht jo.
Rusia e Kina, me armët e të cilave po pajiset?
Sigurisht jo.
Fqinjët, anëtarë të NATO-s?
Sigurisht jo.
Me gjasë do ta sulmojnë shqiptarët. Kosova s’ka fare ushtri, por do ta sulmojë e mund ta pushtojë. Ujku i La Fontenit mpreh sërish dhëmbët: qingji pi ujë në përrua poshtë meje dhe ma turbullon ujin!
Nuk janë fjalë, janë veprime. Armatosje, armatosje. Për shpirt të babës i bën Beogradi këto shpenzime marramendëse, kur serbët kanë të tjera nevoja madhore jetike?
Nëse një pulë shqiptare do të bënte gafë me kakarisë në kufirin serb, Beogradi do të tundte dheun: po na sulmojnë shqiptarët!
Në Tiranë e në Prishtinë s’pipëtin kush.
* Titulli origjinal i shkrimit është: Ujku i La Fontenit në Ballkan
