Presidenti i Serbisë, Aleksandër Vuçiç ka deklaruar se ka refuzuar pikën për njohje reciproke mes Serbisë dhe Kosovës.
Lideri serb shprehet se ajo nuk do të përfshihet në dokumentin që quhet “normalizim ekonomik”.
Vuçiç ka treguar se si amerikanët kanë hapur dokumentin ku thotë se është kërkuar njohja, ndërsa nënvizon se nuk do të firmosë asnjë dokument ku pranohet njohja e pavarësisë së Kosovës.
“Le ta dinë njerëzit si funksionon kjo, pala amerikane na e ndau dokumentin që nuk e ka parë asnjëra palë, ose pala jonë nuk e ka pa me siguri, ishte një “non paper” si i thonë, dhe atë dokument s’mund ta merrni me vete, sepse e ka numrin, e as ta fotografoni e as diçka tjetër. Nuk është diçka e re, por kemi hasur në mirëkuptim. Bëhet fjalë për një shtet që ka njohur pavarësinë e Kosovës, për ne ka qenë diçka formale por jo e befasishme. Nuk është hera e parë që unë reagoj kështu sepse ka ndodhur njësoj edhe në Evropë. Njerëzve në Serbi ju them me siguri: Në asnjë formë nuk e nënshkruaj asnjë dokument ku pranohet njohja e pavarësisë së Kosovës, pikë”, u shpreh ai.
