Pas rasteve të fundit të abuzimeve seksuale të raportuara në medie, ai i 15 vjeçares në Babrru nga roja i shkollës dhe i Adrianës në Shtëpinë e Fëmijës në Shkodër, aktorja e njohur Ema Andrea ka ndërmarrë një projekt artistik për dhunën seksuale të adoleshentëve, në formë proteste.
Në një intervistë për “Abc news” ajo shprehet se është frymëzuar nga protesta “Për fëmijërinë e vjedhur” për të vazhduar këtë projekt në të cilin fton të bëhen pjesë të gjithë artistët.
“Jam frymëzuar nga kjo protestë dhe nuk do doja që të mbaronte me aq dhe aq më tepër që kjo kauzë të mbaronte këtu. Natyrisht për artistët, ka ardhur koha që të reagojnë dhe të mos mbetet thjesht diskutim në kafene. Unë po bëj timen i kam ftuar në mënyrë publike, pasi në mënyrë private nuk funksionon. Ndoshta nuk e besojnë që protestat ia vlejnë. Ndaj e bëra këtë ftesë, për artistë të zhanreve të ndryshme, në mënyrë publike, sepse nuk funksionon kur i fton në mënyrë private
Unë personalisht mbi këtë temë do të ndërtoj një vepër artistike, në “Open Air”. Në tekstin që ofroj është një adoleshente që dhunohet fizikisht dhe psikologjikisht nga bashkëmoshatarët e saj, pastaj është e gjithë situata e gjyqit publik.
Por dua ta lidh me situatën në vendin tonë, me gjykimin publik që ne bëjmë me gjykatën, me deklaratat e forta , majtas – djathtas, lart- poshtë. Nëse dhunohet një grua apo fëmijë jemi të gjithë të dhunuar”, u shpreh Ema.
