Ministrja e Arsimit Besa Shahini nëpërmjet një komunikimi në rrjetet sociale ka bërë të ditur se Mbrëmja e Maturës nuk do të lejohet, pasi nuk mundësohet distancimi socialë.
Përsa i përket provimeve të sivjetshme të maturës, Znj. Shahini njofton se duke filluar nga data 4 maj do të ketë komunikime të përditshme nga ana e Znj. Rezana Vrapi, drejtore e Qendrës së Shërbimeve Arsimore.
Ndërkohë, ajo shprehet se “paralelisht, platforma akademi.al ka xhiruar pyetje dhe zgjidhje të detyrave për provimet kryesore në matematikë dhe shkenca, të cilat do t’i transmetojnë në RTSH. Kështu që, jam e bindur që sivjet do të jeni më të përgatitur se kurrë më parë për të bërë provimin e maturës.
Kthimi në shkollë nuk është i detyrueshëm. Ne po i hapim shkollat për maturantët ekskluzivisht për shkak se ju keni kërkuar që të keni konsultime me mësuesit tuaj përpara se të bëni provimin e maturës. Ndaj, nëse ndiheni që mund të bëni provimin e maturës pa e bërë këtë konsultim, ju mund të qëndroni në shtëpi gjatë kësaj kohe, të punoni individualisht, por duhet të njoftoni drejtorin e shkollës para 11 majit, në mënyrë që të planifikojmë uljen e nxënësve nëpër klasa dhe distancimin social për ata që shkojnë në shkollë”.
Ndërkohë, pyetjes së “nëse do të ketë mbrëmje të maturës sivjet”, ajo i përgjigjet: “Për fat të keq, jo. Mbrëmjet e maturës nuk do të lejohen. Janë festa që nuk mundësojnë distancimin social mes nxënësve, kështu që sivjet ato duhet të anulohen dhe të gjejmë forma të tjera për të festuar”.
