Radiologu Renato Osmanaj së bashku me të gjithë stafin e Spitalit Infektiv ndodhen në vijën e parë të luftës kundër koronavirusit, i cili në të gjithë botën ka shkaktuar mbi 500 mijë të infektuar dhe mbi 20 mijë të vdekur. Në Shqipëri deri tani ka shkaktuar 174 të infektuar dhe 6 të vdekur.
“Neve, në Spitalin Infektiv, nuk kemi kohë të sëmuremi. Duhet të jemi aty.
Babi ju do shumë, por ky është misioni ynë. Ne jemi stërvitur për të bërë këtë punë. Kjo është luftë dhe ne jemi në luftë!
Të gjithë të panikuarit të largohen dhe të dezertojnë. Nuk do t’i gjykojmë për ikjen e tyre. Të rrinë të qetë atje ku janë, sepse një i panikuar neglizhon një të sëmurë dhe ne na hap shumë punë. Duke lënë një të sëmurë në shtëpi infekton të tjerë dhe shumë të tjera. Nuk na duhen të panikuar.
Momentet e dhimbshme bëhen më të lehta, kur nxjerrim pacientë nga spitali të shëruar. Ne nuk kemi kohë të jemi të sëmurë. Ne jemi 24 orë në shërbim të sëmurëve të shtruar pranë Spitalit Infektiv.
Bëni kujdes, e na dhuroni kohë. Pak kohë.”-, shprehet radiologu Osmanaj.
Si ai dhe i gjithë stafi i Infektivit është i vendosur për të qëndruar aty 24 orë në shërbim të pacientëve dhe intervistën e mbyll me batutë: “Unë me Najadën (Najada Çobo) e kemi vendosur, do të infektohemi të fundit”.
/Radio Televizioni Ora/
