Sekretari i Përgjithshëm i Partisë Demokratike, Gazment Bardhi ka reaguar duke sulmuar Ministren e Drejtësisë, Etilda Gjonaj duke i thënë se është pambrojtshme, edhe sikur Edi Rama të drejtojë mbledhjen e SPAK-ut.
Bardhi shprehet se provat e paraqitura nga Presidenti Ilir Meta janë të qarta dhe të pakundërshtueshme dhe se ky do të jetë një test i rëndësishëm për SPAK-un, i cili do të tregojë nëse reforma në drejtësi ka dështuar në gjithçka ose jo.
Reagimi i Bardhit:
Në vend që të mashtrojë qytetarët, Etilda Gjonaj bën mirë të gjejë një avokat. Sikur Edi Rama vetë të drejtojë personalisht mbledhjet e SPAK-ut, ajo është e pambrojtshme. Ministrja e Drejtësisë ka shkelur Kushtetutën, ka shpërdoruar detyrën dhe ka marrë pjesë në një akt mafioz për asgjesimin e Gjykatës Kushtetuese.
Provat e paraqitura nga Presidenti për grabitjen e një anëtari të Gjykatës Kushtetuese nga ana e qeverisë, edhe përmes veprimeve të paligjshme të Ministres së Drejtësisë, janë të qarta dhe të pakundërshtueshme. Etilda Gjonaj duhet të japë llogari para drejtësisë! Është një test i rëndësishëm për SPAK-un, i cili do të tregojë, nëse reforma në drejtësi ka dështuar me gjithçka apo jo.
