Në komunikimin e parë që ka zhvilluar në Instagramin e tij me të rinjtë, kreu i PD Lulzim Basha i ka pyetur ata se cili do të ishte vendimi i parë që do të merrnin nëse do të drejtonin Ministrinë e Arsimit për një ditë.
Siç thotë më pas Basha ndërsa publikon dhe foto e pergjigjeve të të rinjve, shumica e tyre kanë kërkuar të anulohet ligji për Arsimin e Lartë. Kryedemokrati thotë se ajo që kërkojnë shumica e të rinjve, anulimi i ligjit për Arsimin e Lartë, është në fakt pika e parë e programit të PD për arsimin.
‘Jam shumë i befasuar që brenda pak orësh mijëra prej jush, ndjekës të mi në Instagram, i jeni përgjigjur pyetjes se cili do të ishte vendimi i parë nëse do t’ju besohej posti i ministrit të Arsimit?
Mes mijëra përgjigjeve dhe komenteve, spikat sygjerimi për të anulluar Ligjin për Arsimin e Lartë, që është pika e parë e programit tim, programit të PD për Arsimin e Lartë.
Sygjerimet e tjera kanë të bëjnë me shtimin e financimeve për shkollat dhe universitetet tona dhe në veçanti krijimin e kushteve më të mira në universitet tona, në mënyrë që studentët tanë të marrin cilësinë e duhur të arsimit dhe të përgatiten për të dalë në tregun e punës, për të siguruar punë me kushte dinjitoze dhe paga më të larta.
Ju falenderoj nga zemra që bashkëbiseduat me mua sot nëpërmjet Instagramit dhe shpresoj ta vazhdojmë këtë formë komunikimi edhe për probleme dhe çështje të tjera që janë të rëndësishme për ju’, thotë kreu i PD Lulzim Basha përmes një videomesazhi të shkurtër.
