Kryeministri Edi Rama, ka reaguar në lidhje me polemikat e shumta, që ka ndezur ligji i paketës antishpifje për mediat.
Përmes një statusi në Twitter, Edi Rama shkruan se mediat nuk e kanë lexuar projektligjin dhe duan të shkruajnë si të duan dhe të shpifin sa të duan.
“Ose s’e kanë lexuar projekt-ligjin, ose duan të prekin lirisht dinjitetin e çdo kujt nëpër portale e faqe sociale e të tallen me të vërtetën e opinionin publik, duke shkruar çfarë tu teket, duke shpifur sa tu teket, duke shantazhuar e duke i vënë gjoba kujt tu teket”.
Sipas Ramës ligji është konsultuar dhe përpunuar prej një viti me OSBE.
“Projektligji është konsultuar e përpunuar prej 1 viti, nen për nen e pikë për pikë me OSBE dhe do të hyjë në seancë pa asnjë cen në aspektin e standardeve të lirisë për tu shprehur e të së drejtës për tu informuar pa kufizim, po edhe të mundësisë për tu mbrojtur nga shpifjet”, shkroi ai.
Por, menjëherë pasi e ka postuar këtë status Kryeministri e ka hequr nga llogaria e tij në Twitter.
