Tashmë flitet për një mundësi të marrësh pjesë në një nga kupat e Europës, kuptohet për skuadrat që janë në krye dhe me të drejtë mund të quhen pjesë e elitës së Kategorisë Superiore. Skënderbeu dhe Partizani e kanë fituar një “vizë” dhe po përballen për nivelin e përfaqësimit, ndërsa pas ndeshjeve të së hënës, të tjetër e kanë kompromentuar dukshëm objektivin e tyre. Përjashtim bën vetëm Teuta e Durrësit që fitoi në Pukë, ndaj një Tërbuni, i cili pas fitores në transfertën e Korçës, më shumë i hapi probleme vetes, pasi shpërthyen kontradikta që u konkretizuan me pezullimin e kapitenit Karakaçi. Ndërkohë që Tirana është klubi që vazhdon të vuajë pasojat e tjetërsimit të identitetit. Humbja në “Selman Stërmasi” ndaj Skënderbeut ka shumë mundësi ta lërë sërish jashtë Europës skuadrën më të titulluar të vendit, pasi në fundjavë do të jetë udhëtuese në “Niko Dovana” të Durrësit. Aktualisht bardheblutë janë 4 pikë larg në tabelën e klasifikimit nga skuadra e Maganit. Kurse trajneri peqinas ka dy arsye të forta për ta lënë në shtëpi Tiranën; e para sepse e përzunë pa të drejtë, meghithëse e drejtoi në momente shumë të vështira ekipin që prej kohësh i ka mbetur vetëm fanela dhe e dyta se e do vetë të jetë pjesë e Europa League, madje bashkë me të birin. Por edhe Partizani i ka bërë një dëm të madh Kukësit me atë gol në minutat e fundit. Verilindorët ishin ekipi më në formë i momentit, por tani duhet të llogarisin vendin e tretë në kampionat, pasi kanë një ndeshje shumë të vështirë në Vlorë, kundër një Flamurtari që nuk ka më luksin të bëj komplimente. Dhe për më shumë, finalja e Kupës ndaj ekspertëve të Laçit nuk ka asgjë të sigurtë për të siguruar një biletë europiane.
