Kryetari i PD-së: 2/3-ta e tenderave publikë bëhen pa garë dhe blihet më shtrenjtë
Kryetari i PD-së Lulzim Basha tha sot se 2.2 miliardë euro janë vjedhur përgjatë këtyre dy viteve nga qeveria Rama. Ai tha se pavarësisht rritjes së të gjitha taksave, të ardhurat në buxhet janë më të ulëta se të qeverisë së shkuar që kishte taksa më të ulëta. Afera e CEZ dhe volumin e saj prej 500 milionë eurosh dëme, ishte sërish pjesë e denoncimeve të kryetarit të PD-së. Basha përsëriti akuzat e tij ndaj kryeministrit për korrupsion në procesin e prokurimeve publike.
“Qeveria ia ka dalë të vendosë dy rekorde. 2/3-ta e tenderave publikë bëhen pa garë, duke blerë më shtrenjtë. Ku e merr këtë shërbim me çmimin më të lartë? Njerëzit të cilëve Edi Rama u jep prokurimet, apo me çmimin më të lartë, për njerëzit e njohur si klientelë. Dhe këtu përfshihen edhe shpenzimet e luksit, ndërkohë që popullsia krihet në mjerim. E mbani mend parullën e Rilindjes: 5% e shqiptarëve zotërojnë 50% të depozitave. Sot zyrtarisht, këta që erdhën për një shpërndarje më të barabartë, sot drejtojnë një vend ku 4% e popullsisë, zotërojnë 58% të depozitave. Ndërkohë, konfirmohet se 46% e popullsisë jeton me më pak se 2 dollarë në ditë për familje jo për frymë. Kam ndërmend t’u them se cila është kombëtarja e Oligarkisë, formacioni në fushë, jo se ajo në stol është më pak e rrezikshme”, tha Basha.
