Danilo Alvesh dhe Zhoao da Silva zhvlerësojnë golin e Cetkoviç, ndërkohë që skuadra e Ramadanit shkëputet katër pikë nga zona e ftohtë
Flamurtari arrin një fitore shumë të rëndësishme (1-2), madje ndoshta ky është edhe 3-pikëshi më me vlerë i marrë nga skuadra nën drejtimin e Zekeria Ramadanit. Tashmë vlonjatët janë shkëputur katër pikë nga Bylis i vendit të parafundit, ekip me të cilin prej kohësh është në garë për t’i mbijetuar rënies një kategori më poshtë. Kanë qenë vendasit e Laçit ata që kanë kaluar të parët në avantazh, me anë të Cetkoviç që në të 17’. Gjithçka e bërë nga futbollisti i skuadrës kurbinase ishte perfekte, marrja e topit driblimi dhe deri tek goditja që nuk i la asnjë shans Ilion Likës. Në minutën e fundit të pjesës së pare, Sheta ishte i pafat, pasi topi i goditur me kokë prej tij u përplas në traversë, duke e mbajtur në lojë Flamurtarin. Në fraksionin e dytë gjithçka ndryshon në favor të miqve nga Vlora, të cilët barazojnë fillimisht me Danilo Alvesh në të 57’ dhe 22 minuta më vonë është Zhoao da Silva që mendon për t’i dhënë pikët e plota skuadrës së tij. Alvesh është ndoshta blerja më e mirë e merkatos së janarit nga skuadrat tona të Superiores dhe një gjë të tillë po e tregon ndeshje pas ndeshje. Goli i shënuar në Laç është i treti në rradhë për Flamurtarin, pas atyre ndaj Teutës dhe Partizanit, duke i dhënë një ndihmë të madhe skaudrës së tij në këtë periudhë të vështirë.
