Darka e shumëpërfolur në shtepinë e re të Hashim Thaçit nuk i ka ndryshuar bindjet, Ramush Haradinajt. Ai është i prerë për të mos ndryshuar kufijtë e Kosovës pavarësisht presioneve.
Në një intervistë për emisionin “Pressing” në televizionin “T7”, Haradinaj zbuloi se ishte Edi Rama ai që kishte iniciuar darkën të parashikuar fillimisht në Tiranë dhe që më pas u mbajt në Prishtinë. Por, nuk la pa shtuar se kryeministri shqiptar nuk duhet t’i japë vetes më shumë ngarkesë sa mund të mbajë.
“Rama le të thotë të vetat. Përgjegjësia e tij është Shqipëria. E shoh në rregull deri tani, por nuk duhet t’i japë vetes më shumë ngarkesë sa mund të mbajë. Ne jemi vetë këtu vendimmarrës”, tha prerë Haradinaj.
Ai ka komentuar edhe rolin e drejtorit të Klan Kosovës, Baton Haxhiu, ku deklaron se ai ka kaluar limitet.
“Unë nuk e kuptoj misionin e zotit Haxhiu dhe ndonjë Haxhiu tjetër në shoqërinë tonë që me shku e me na shpjegu neve sa i mirë është ky opsion. Pse s’po rrin ai në media të vet…? S’e kuptoj çka i vyn atij një rol i këtillë? Nuk e marr vesh nga i buron detyra? Unë e shoh zotin Haxhiu të involvuar skajshmërisht në një agjendë që s’ka pse me qenë aq e rëndësishme për të”, tha ai.
