Nga Elidon Nika
2018-ta iku e bashkë me të edhe i ashtuquajturi Viti Mbarëkombtar i Gjergj Kastriotit-Skenderbeu. Por për këto sorrat tona politikanë, të cilët i kushtojnë një vemendjë false Kryezotit tonë, ishte një vit i dështuar. Asnjë paradë nuk pamë në nderim të të Përshëndritshmit tonë, asnjë monument, asnjë film, dokumentar, shfaqje arti, historie apo e çfarëdo lloji qoftë ajo. Asnjë restaurim të monumenteve, kalàve apo muzève aktuale.
Të vetmet që pamë, ishin një monument diku afër Elbasanit, për të cilin nuk kishte kontributuar shteti, e një në Zym të Hasit, në anën tjetër të Shqipnisë, pra Kosovë. U lumtë këtyre shqipeve! Ka pasur xhami të ndërtuara ama, gjatë vitit, në Shqipni e Kosovë. Përgjatë gjithë tokës Arbnore. Asgjë kundër fesë e objekteve të kultit, por të ndërtohen xhami mbi kalà, kisha të vjetra bizantine e katolike, mendoj se është marrëzi e shndërrim e përdhosje identiteti. Të gjitha këto të financuara nga babushi i politikanëve tanë, Naltmadhnia e Tij, Erdogan.
Po të ishin xhami që po i ndërton shteti ynë ose populli e komuniteti musliman për plotësimin e kushteve ndaj komunitetit tyre, unë do isha i pari që do jepja parà për t’u ndërtuar. Ose po t’i financonte Amerika apo Italia apo Franca le të themi, prapë s’do merakosesha, por merakosem se po i financon mendja djallëzore e Erdoganit e shteti i tyre që po mundohet të na pushtojë në këtë mënyrë “moderne”. E të gjitha këto të fundit nëse do financonin kisha me qëllime mizore, gjithashtu do isha kundër.
Pse nuk na ndihmojnë në infrastrukturë meqë na duan aq shumë këta “vëllezër”? Në çfarëdo fushe qoftë ajo, perveç xhamive, që edhe emrat ua vënë të sulltanëve që vranë, prenë, plaçkiten e përdhunuan mijëra e mijëra Arbnorë. Ka pasur edhe takime me babën Erdogan përgjatë vitit. Po ashtu ka pasur edhe një linjë ajrore të stërdështuar që askush s’po flet më për të e që aq shumë trazira politike në vend ka pasur, sa ajo u harrua me një shpejtësi të çuditshme.
Meqë ra fjala, ka udhëtuar kush me “Lasgushin”? Se unë nga New York-u po pres të pres biletë direkt për Tiranë, pa dashur të kaloj nga Turqia apo Serbia se kështu do isha më i lumtur unë, e gjithashtu edhe Gjergji me Lasgushin. Gjergjit të Madh, Lasgush Poradecit, e shumë e shumë engjujve shqiptarë besoj se nuk u zë vendi vend më tek shohin mbi ne.
