Një zemërim i papërmbajtshëm, duart në gjoksin e arbitrit Irrati dhe në fund lot. Ky është fundi i Napolit në garën për të fituar titullin kampion, për herë të dytë pas “epokës Maradona” dhe gjithçka erdhi pikërisht nga lideri i kësaj skuadre, Gonzalo Higuain. Në ndeshjen e Friulit, kundër Udinezes, sulmuesi argjentinas barazoi avantazhin e përkohshëm të vendasve, duke shënuar golin e 30-të sezonal në këtë kampionat, ndërsa 15 minuta përpara përfundimit të kohës së rregullt e lë skuadrën me 10 futbollistë, duke marrë kështu kartonin e parë të kuq pas 1149 ditësh. Në fund u ndëshkua edhe trajneri Sarri, për të cilin nuk është hera e parë dhe tashmë Juventus duket se ka hipotekuar një tjetër titull kampion në Serinë A.
Një tjetër humbje në transfertë për Milanin, pas asaj në Rexhio Emilia ndaj Sasuolos. Ndërkohë që kjo kundër Atalantës erdhi pas një avantazhi të përkohshëm të skuadrës së Sinisha Mihajloviç, nga një gol që si rrallë herë nuk u shënua nga Baka, por Luiz Adriano me 11-metërsh, që në të 5’. Milani që për herë të fundit larg “San Siros” ka fituar më 3 shkurt në Palermo, rrezikon sërish të mos marrë pjesë në Europë, pasi është pozicionuar 6 pikë larg Interit të vendit të pestë, madje rivalët e vjetër kanë luajtur një ndeshje më pak. Ndërsa në Romë nuk ka derbi. Ekipi i Spaletit ka shkatërruar Lacion 1-4, duke bërë çfarë donte në “Olimpiko”, por në një farë mënyre duke i dhënë të drejtë edhe Berluskonit, i cili vazhdon të mendojë që largimi i El Sharauit nga skuadra e tij ishte një çmenduri.
