Ky që shihni në këto foto është Qazim Laçi, futbollist nga më të rëndësishmit e përfaqësueses sonë U-21, gjë që u pa qartë edhe disa ditë më parë në “Elbasan Arena”, fillimisht ndaj Greqisë dhe më pas ndaj përfaqësueses Shpresa të Hungarisë. Dhe mbi të gjitha të bën të shpresosh për një të ardhme të afërt në Kombëtaren A, derisa ka arritur të bëj hapa gjigandë në karrierën e tij, duke u thirrur së fundi nga ekipi i parë i kampionëve të Greqisë, Olimpiakos. Laçi ka luajtur më parë për skuadrat e moshave të klubit nga Pireu, madje për personalitetin në fushë ka fituar edhe shiritin e kapitenit.
Qazimi ka lindur 20 vjet më parë në Peshkopi, nga një familje me preardhje nga fshati Brest i rrethit të Dibrës. Me një gatësi 179 centimetra, në vendin fqinj aktivizohet si mesfushor, ndërsa tek Shpresat, për nevojë të skuadrës, trajneri Jupi e ka përdorur si mbrojtës qendre. Një i ri që e ka arritur gjithçka me sakrifica të mëdha, por edhe talent, duke bërë të ditur se të arrish majat mjafton edhe kaq, pa qenë e nevojshme të ndërrosh emrin, apo shpirtin.
