Sipas raportimeve të mediave greke marrëveshja mes Shqipërisë dhe Greqisë është në favor të fqinjit tonë, por opozita greke kërkon më shumë transparencë nga qeveria dhe kryeministri Alexis Tsipras.
Demokracia e Re, partia kryesore e opozitës, ka reaguar përmes një deklarate për këtë çështje, duke e akuzuar ministrin Kotzias dhe kryeministrin Tsipras për bisedime sekrete me Shqipërinë.
“Diplomacia sekrete e Tsipras dhe Kotzias ka rezultuar në dëm kombëtar me marrëveshjen e Shkupit. Tani, njerëzit mësojnë të habitur për një marrëveshje të ngjashme që po diskutohet me Shqipërinë. Ne i kërkojmë Kryeministrit dhe ministrit të Jashtëm të informojnë menjëherë Parlamentin për çfarë negociojnë në fshehtësi me Tiranën”, thuhet në njoftimin e Demokracisë së Re.
Ndërsa në Tiranë diskutohet kjo marrëveshje sekrete, opozita jonë nuk ka kërkuar llogaridhënie nga qeveria që të informojë përmbajtje e këtyre bisedimeve.
