Sekretari i Përgjithshëm Arben Ristani: Strazimiri nuk kishte armë, por kllëf celulari
Ristani ka mohuar faktin se deputeti demokrat Strazimiri mbante një armë në brez kur ishte duke protestuar tek parku i liqenit. Sipas Ristanit, ishte një kllëf celulari dhe jo armë. Në të vërtetë mediat fotografuan qartazi armën në brezin e deputetit Strazimiri, i cili as vetë nuk e mohoi të kishte një tillë. Megjithatë, Ristani e mohoi: “Strazimiri nuk ka pasur pistoletë me vete, fotoja nuk tregon asgjë. S’ka prova për Strazimirin, s’ishte armë, por këllëfi i celularit. Nëse do kishte kushte flagrance, Strazimiri do ishte arrestuar”, tha Ristani.
Nënkryetari i grupit parlamentar të Partisë Socialiste, Taulant Balla tha se Partia Demokratike nuk e ka dënuar incidentin e rëndë të armëmbajtjes pa leje të pistoletës prej deputetit Gent Strazimiri. Në emër të PS, Balla kërkon që Strazimiri të procedohet penalisht në kushtet e flagrancës të armëmbajtjes pa leje. Për më tepër, Balla i kujtoi PD-së që kjo vepër penale është e përfshirë në Ligjin për Dekriminalizimin dhe i bën thirrje selisë blu të dëshmojë me vepra dhe jo me fjalë respektin ndaj ligjit.
“Duke i konsideruar veprimet e deritanishme të Policisë së Shtetit si tepër korrekte, kërkojmë që sipas ligjit shtetasi Gent Strazimiri të procedohet penalisht në kushtet e flagrancës të armëmbajtjes pa leje. Kujtoj që kjo vepër penale është një vepër e përfshirë në Ligjin për Dekriminalizimin. Është rasti që PD të dëshmojë me vepra dhe jo me fjalë respektin ndaj ligjit. Gjithashtu dënoj edhe dhunën e deputetëve dhe përfaqësuesve të tjerë të PD ndaj punonjësve të Policisë së Shtetit dhe Policisë Bashkiake të Tiranës”, tha Balla.
