Nga Gazmend Kapllani
Dje, në Selanik të Greqisë, nacionalistë të majtë e të djathë, rrahën kryetarin e bashkisë se qytetit Janis Butaris. Një burrë i mençur dhe trim që vite tashmë i kundërvihet nacionalizmit histerik, me të cilin është mbruajtur shoqëria greke – që nga krijimi i shtetit modern grek.
Butari është mbi të gjitha një simbol që urrejnë Kisha Orthodokse Greke, fashistët, stalinistët, kopukët, hajdutët, shteti i thellë grek. Përse e urrejnë? Sepse thotë disa të vërteta të thjeshta, si për shembull, flet për holokaustin e hebrejve të Selanikut (një qytet, universiteti i të cilit është ndërtuar mbi varrezat e hebrejve te qytetit!); flet për të kaluarën e një qyteti, Selanikut, qe dikur ishte një nga qytetet më kozmopolite në Mesdhe dhe që vala e nacionalizmit dhe spastrimeve etnike e ka kthyer në një provincë, ku mbizotëron fjala e talibanëve ortodoksë dhe e paranojës nacionaliste.
Por, unë për tjetër gjë doja të shkruaja. Kur isha në Tiranë, javën e kaluar, pashë afishe të një koncerti që do jepet në Tiranë në datën 24 Maj, të një këngëtari grek quajtur Notis Sfakianakis; Notis këndon tallava greke, të quajtur në greqisht edhe “muzikë skiladhiko”, ose ne shqip “muzikë qençe” apo “muzikë hum-hum”. Nejse, në një shoqëri të hapur njerëzit janë të lirë të dëgjojnë dhe të adhurojnë edhe muzikën hum-hum.
Problemi është se Sfakianakis është një fashist i hapur, i cili i ka quajtur shqiptarët “plehra”, që jep koncerte për nazistët e Agimit të Artë dhe nxit urrejtjen dhe paranojën nacionaliste në Greqi (perveç faktit qëe është një ufolog që beson se grekët janë racë aq superiore, saqë e kanë prejardhjen nga jashtë-tokësorët!).
Më bëri përshtypje që ata që Sfakianakis i quan “plehra” do paguajnë 100 apo 200 euro për biletë që ta dëgjojnë, ndërsa në Greqi biletat për koncertet e tij nuk i kalojnë zakonisht 50 euro. Sigurisht, me aq shumë pare të pistë që qarkullon në Shqipëri, shumë “plehra”, mendoj, s’i kanë për gjë 200 euro për një natë.
Por, ajo që të trondit në rastin e atdheut tonë ende-geto është që ne nuk adhurojmë dhe respektojmë vetëm anët më të këqija të vetvetes, por edhe anët më të këqija të të tjerëve.
Koncerti i këtij ufologu fashist dhe urrejtje-ndjellës nuk është vetem ofendim i rëndë për shqiptarët. Është fyerje e rëndë edhe për njerëzit demokratë në Greqi dhe kudo në Ballkan apo Europë.
