Kryetari i LSI-së: Të gjithë pro Venecias, PS të jetë më optimiste për Reformën në Drejtësi
Me qetësi e ka pritur kryetari i LSI-së, Ilir Meta kërcënimin e Pandeli Majkos për zgjedhje të parakohëshme. Dy ditë më parë, Pandi Majko komentoi qëndrimet e deritanishme për reformën në drejtësi duke lënë të kuptohet se palët nuk janë dakord mes tyre dhe se ka mungesë konsensusi brenda mazhorancës. Për këtë qëndrim të deputetit socialist, Ilir Meta shprehet se i sygjeron socialistëve të jenë më shumë optimistë për Reformën në Drejtësi, pasi sipas tij të gjitha palët kanë rënë dakord me rekomandimet e Venecias dhe se duhet punuar që gjithçka të arrihet para vizitës së Komisionerit Hann në fund të muajit në Tiranë.
“Të gjithë kanë rënë dakord që standardet evropiane të kësaj reforme i përcakton Komisioni i Venecias, i gjithëpranuar nga të gjithë dhe ky komision ka folur mjaft qartë për të gjitha çështjet, ndaj të cilave janë kërkuar sqarime, interpretim, opinione, apo vlerësime. Padyshim që jam i sigurt se përveç vullnetit të përbashkët të gjithë forcave politike për të interpretuar këto rekomandime në mënyrë objektive dhe të paanshme, pra jashtë interesave të ngushta partiake, kam theksuar që për çështje ku do të ketë dallime të caktuara, ne përsëri kemi fatin që kemi EURALIUS-in, misionin e BE-së dhe OPDAT-in, atë të SHBA-ve, të cilët kanë kontribuuar që nga fillimi në asistimin e kësaj reforme dhe mund të jenë përsëri dy misione të cilat përbëjnë përsëri referencën e përbashkët dhe konsensuale për ato çështje ku ende ka disa lexime të ndryshme”, tha Meta.
