Nga Eurial Vinka
Nuk mjaftonte që pronarët të pushktuar dhe të burgosur politikë të masakrohen nga diktatura komuniste, po duhej të dilnin disa individë, llumi i shoqërisë, gangsterë, hajdutë e mafiozë, që t’i masakronin edhe në demokraci, nën hundën e presidentëve dhe të kryeministrave, që nuk denjonin ta kthenin kokën nga padrejtësitë që ushtroheshin para syve të tyre, të mbuluar me cipën e indiferencës dhe mospërfilljës.
Shteti bën sehir, sepse ua ka lenë në dorë dhe kompetencë prokurorive e gjykatave si dhe policisë që të ndjekin këta keqberës e hajdutë që vjedhin haptas pronat e pasuritë e pronarëve, pa i qortuar e pa u kërkuar kush llogari. Se mos këta gangsterë ia varin fort drejtësisë e shtetit! Vetë ligj, e vetë shtet. Kur qenkan bërë kaq të zotët që nga brekëgrisur të bëhen milionerë e miliarderë? Epo dihet fort mirë, nga burgjët e Italisë, ku janë mbyllur për krime ordinere, drogë e prostitucion, aty janë shkolluar e diplomuar si Prof. Dr. mafiozë, që të behën milionerë e miliarderë duke u vjedhur pronarëve të shkretë e të pafuqishëm pronat e pasuritë e paguara me gjak e lot vuajtjesh e torturash në burgjet e diktaturës.
Nuk mjaftuan masakrat e komunizmit mbi ta, por duhet të dilnin këta karabedikë e hajdutë që t’i masakronin përsëri, nën hundët e shtetit e të insitucionëve të tij. Ata s’pyesin as për polici, as prokurori e gjykatë, hyjnë e dalin si në shtëpi të tyre. S’guxon kush t’i prekë apo qortojë. Mjer ai, kushdo qoftë, shtetar apo privat, e sa për pronarët u tregojnë shqelmin dhe koburën që mbajnë pas b….(pa leje) si kapadai, e s’ja mban kujt t’i prekë me pupël.
Krah për krah me policët, prokurorët e gjykatësit, kryetarët e bashkive dhe prefektët, Prof. e Dr. kërkushët, me alamet diplomat në xhep, blerë me tefin e dollarit (disa mijëra) në universitetet që kanë mbirë si kërpudha shpifarake mes Tiranës, bëhën drejtorë, deputetë e shefa policie. Cili prokuror, gjykatës apo polic guxon t’u kërkojë llogari se si u bënë ashtu si me magji milionerë e miliarderë, kur s’kishin gjë pas shpirtit ? Mos vallë korrupsioni ka hyrë në zyrat e tyre dhe i bën të mbyllin sytë e veshët ndaj këtyre gansterllëqeve? Cili burrë shteti është në gjendje ta pastrojë vendin nga kjo sëmundje e keqe e këta demonë që përfitojnë nga demokracia e madhe, për të livadhisur për shtatë palë qejfe, mbi kurrizin e të tjerëve?
Deri kur o Zot (Presidentë a Kryeministra), do të vazhdojë kjo gjendje që në qytetet shqiptare të vazhdoje sundimi i njerëzve të fortë, i ketyre Al-Kaponëve, të pa din e imanë, që ushtrojnë pa u hyrë gjëmb në këmbë zanatin e tyre mafioz me korrupsion e terror ? A ka, a s’ka shtet?! A ka, a s’ka drejtësi?! A ka, a s’ka prokurori e gjykatë?! A ka, a s’ka polici për ndjekjen e krimeve ekonomike në dëm të qytetarëve dhe kryesisht në dëm të pronarëve që u grabitën e vidhën pronat në dritë të diellit, e shteti rri indiferent e moskokëçarës?! A ka, a s’ka ligj për këta keqbërës që po helmojnë shoqërinë shqiptare me veprat e tyre kriminale. Ju lutemi na jepni përgjigjje, që ta flemë mendjen, ja t’i dilni zot kësaj plage kriminale, ja të na e thoni troç, rrini urtë, sus, e mos t’u ndihet zëri, më keq se nën diktaturë!
Një mikut tim prej 27 vitesh nuk i kthehet shtëpia e pushtuar në vitin 1945 nga partizanët trimosha, që vazhdojnë ta pushtojnë e s’ka burrë nane që i nxjerr prej saj, paçka se kryeministri ka deklaruar se shtëpitë e pushtuara në kohën e diktaturës do t’u kthehen pronarëve pa gjyq. Kush e përfill atë fjalë? Askush! Kjo është e gjitha. Sundon padrejtësia, sado që thërrasin me te madhe për reformë në drejtësi. Fjalë që i merr era me gjithë letrat e shpurpurisura në kundërshtim me shprehjen “Verba volant, scripta manent”. I shkreti latin, s’mund t’i shkonte mendja kurrën e kurrës, se do të vinte një kohë ku komunizmi të mos përfillte as fjalë, as shkrime. Koha po e vërteton, e ku ? Në Shqipërinë tonë, aq të lavdëruar me fjalë dhe aq të përmbysur me kokë në hi e në baltë. Pashko Vasa paska pasur shumë të drejtë me qa mjerimin e Shqipërisë, që ne po e shohim fare mirë!
