Ka than' i moçmi: 

“Shqiptari e ka zakon që kundështon para se të marrë vesh".

                          -Faik Konica

2 Prilli që i mungoi Shqipnisë…

Nga 27.al 0

Nga Ilir Seci

U banë 26 vjet nga dita e 2 Prillit 1991, dita kur në Shkodër diktatura mori të vetmen goditje të vërtetë në tanë këtë farsën 25 vjeçare të ashtëquejtun “demokraci”…

Më 2 Prill 1991, Shkodra e bani të veten, liroi qytetin nga Partia e Punës. Komiteti i Partisë u dogj, kriminelët komunistë lypën vrima, ku të fshiheshin! Për fat të keq pjesa tjetër e Shqipnisë nuk pat pjekuninë qytetare dhe kurajon njerëzore të Shkodrës shekullore, djepit të kulturës kombëtare, që sa here asht ba martire për të mirën e Shqipnisë, ashtu si atë ditë të 2 Prillit 1991, kur prapë Shkodra flijoi bijtë e vet për me shporrë farën e keqe të Moskës dhe me e lirue vendin nga diktatura staliniste.

Por, për fat të keq pjesa tjetër e vendit nuk e pasoi shembullin e Shkodrës dhe qe ku jemi sot 26 vjet mbrapa, me të ardhmen të mbajtun peng nga korrupsioni dhe trafiqet, të ngërthyem në rrjeten e sistemit neodiktatorial që u ripërtëri me klyshët e kuq në pushtet! Më 2 Prill 1991 komunistët tip Sul Bushatë & co, ja mbathën nga sytë kambët – “Vrima e miut 500 grosh” – e sot bijtë e tyne drejtojnë në këtë të ashtëquejtunen “demokraci”. Shqipnia nuk pati pjekuninë e Shkodrës, Shqipnia nuk ndoqi shembullin e Shkodrës. Sekretarët e PPSH-së, xhaketakthyemit që me direktiva u banë demokratë mbrenda natës, uzurpuen partitë e reja, manipuluan forcat e porsadala demokratike, sepse ishin caktuar me misionin e shpëtimit të lëkurave të kriminelëve të kuq! Pikërisht kriminelëve që ushtruan diktaturën má gjakatare të Europës Lindore, pikërisht kriminelëve që vranë edhe me 2 Prill 1991, xhaketakthyerit uzurpatorë ua shpëtuan lekurët! Këto 26 vite “demokraci” kjo kastë uzurpatore arriti me i shndërrue në një kleptokraci të babëzitun që me korrupsion të shfrenuem shpërbleu lakenjtë e PPSH-së. Falë uzurpatorëve që mashtruan forcat demokratike, kriminelët e kuq e kaluan këtë periudhë pa ju cënue dominimi politik dhe ai ekonomik. Por, mos t’i rrejnë mendja se ja hodhën përgjithmonë! Përvoja historike ka diftue se gjithmonë asht ma e rrezikshme ajo masë e njerëzve që mashtrohet ma gjatë, ajo masë e njerëzve që i asht vjedhë e ardhmja.

Vullkani i 2 Prillit 1991 asht fashitë por nuk asht shuar! Kriminelët e Bllokut fituan kohë, por ende nuk ja kanë hedhur plotësisht! Përditë e ma shumë po shihet që komunistët bllokmenë dhe pjella e tyne nuk kanë nxanë mend! Ma keq për ta! “Peni këputet prej së holli e zullumi këputet prej së trashi!” – thotë nji fjalë e urtë shkodrane.

P.S. Fotot janë marrë nga faqja onlineCorbis”. Fotografitë janë ba nga gazetare të huej me datën 3 Prill 1991…

Loading...

Lini një koment

Adresa juaj e Email-it nuk do të bëhet publike

Mund të përdorni HTML tags dhe atributet: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.

gjithësej