Një ditë pas protestës së mbajtur nga opozita përpara Parlamentit, zëvendësambasadorja e SHBA-ve në vendin tonë Leyla Moses-Ones ka shkuar për takim në selinë e PD-së me Lulzim Bashën.
Takimi mes kreut të demokratëve dhe zv/ ambasadores Leyla Moses Ones zgjati mbi një orë dhe më pas mësohet se i është drejtuar selisë së LSI-së për të takuar kryetaren e LSI-së, Monika Kryemadhi.
Insistimet e ndërkombëtarëve që protestat të jenë paqësore kanë qenë të shumta, ndërsa në bllok e kanë quajtur të nxituar vendimin e opozitës për të djegur mandatet.
Ndërkohë dje 4 deputetë të LSI-së bënë betimin në Kuvend. Së bashku me mandatin e Myslim Murrizit dhe të Lefter Kokës, numri i deputetëve shkon në 85. Ndërsa në KQZ dorëzuan dje formularin e dekriminalizimit dhe 6 të tjerë, çka çon në një kuvend me 91 mandate.
Në 16 Mars PD dhe LSI kanë deklaruar që do të mbajnë protestën më të madhe të 30 viteve në Shqipëri, ku do të jenë qytetarët ata që do të përcaktojnë fatin e Edi Ramës.
