Një re gjigande tymi e dukshme thuajse në të gjithë Tiranën, ka alarmuar kryeqytetin mëngjesin e kësaj të diele. Një zjarr i fuqishëm ka rënë në një fabrikë riciklimi duke shkaktuar panik në zonë.
Zjarri vijon të jetë aktiv ndërsa duket e vështirë ndërhyrja e forcave zjarrfikëse për të bërë fikjen e tij. Ndërsa zjarri avancon shpërthime të vogla ndodhin në ambientet e fabrikës.
Nuk raportohet të kete të lënduar, ndërsa nga zjarri rrezikohen banesat dhe bizneset përreth. Banorët janë larguar nga zona e rrezikut, ndërsa mbi shkaqet e zjarrit nuk ka ende asnjë detaj.
Kjo është hera e dytë që kjo fabrikë është përfshirë nga zjarri dhe në të dyja rastet ka pasur dëme të shumta materiale.
Banorët e zonën shprehin shqetësim për situatën duke pretenduar se zjarri rrezikon banesat e tyre, përveç ndotjes që është tejet e madhe për shkak të djegies së plastikës.
Kreu i zjarrfikëses në Tiranë, Shkëlqim Gonxhaj, deklaroi se për momentin, forcat e fikjes së zjarrit po përqendrohen për të parandaluar përhapjen e flakëve në magazinën ngjitur të fabrikës së riciklimit. Ai shtoi se kompania nuk ka marrë masa për sistemin e mbrojtjes nga zjarri.
