Investitori “Amadeus Development” ka qenë dashur të paktën të rishqyrtojë planin e tij (nëse veç ka pasur ndonjë plan) dhe në bashkëpunim me shoqërinë civile dhe institucionet relevante në Shkup, të mendojë për rindërtimin e shtëpisë së lindjes së Nënës Terezë, sipas të njëjtës pamje dhe të njëjtës arkitekturë.
Nga Emin Azemi
Gjykata Penale e Shkupit ka njoftuar se të hënën do të fillojë procesi kundër ish-ministrit të Transportit dhe Lidhjeve, Mile Janakievski dhe dhjetë të akuzuarve të tjerë, të cilët ngarkohen për shitjen e tokës shtetërore në qendër të Shkupit.
Parcela e privatizuar prej 1.046 dhe e shitur për 1 milion e gjysëm euro, në vitin 2013, ishte e paraparë për ndërtimin e një pallati 20 katësh të stilit barok. Bëhet fjalë për hapësirën në mes të sheshit dhe Qendrës Tregtare (GTC), i cili aktualisht është i mbuluar me një park artificial.
Janakievski dhe të tjerët akuzohen për keqpërdorim të detyrës zyrtare dhe dëmtim të buxhetit të shtetit për 2.6 milionë euro.
Mbetet të presim se çka do të sjellë ky proces gjyqësor që do të fillojë të hënën: nëse hapësira do të ngelë pronë private e investitorit nga Shqipëria, apo sërish do t’i kthehet shtetit, siç ka qenë më parë.
Gjithçka do të ishte në rregull me këtë privatizim, sikur të ndodhte edhe një konsultim paralel me ata që e njohin Shkupin mirë, e sidomos i njohin themelet e traditës së lavdishme, prej ku lindën edhe njerëz të famshëm, siç është Nënë Tereza, shtëpisë së cilës tani po ia humbin gjurmët, duke ia larguar themelet prej aty dhe duke e bllokuar qasjen deri te pllaka përkujtimore e vendosur në vendin ku kishte qenë shtëpia e lindjes së saj.
Një konsultim kurtoazie, madje ndodh edhe kur njerëzit para se ta blejnë një shtëpi apo një tokë, të pyesin përreth, nëse ajo pronë është kontestuese, nëse dikujt i është bërë padrejtësi rreth asaj prone, ose në rastin konkret, nëse ajo pronë ka të bëjë me ruajtjen e trashëgimisë kulturore e shpirtërore të shqiptarëve të Shkupit.
Si ka mundur t’iu ikë këtyre konsultimeve investitori nga Tirana, “Amadeus Development”, i cili nëse jo në fillim, atëherë ka mundur pastaj të informohet nga mediat që në fakt ai ka privatizuar edhe një hapësirë ku para 110 viteve kishte lindur nobelistja shqiptare, Nënë Tereza.
Mund edhe të mos i kontestohet atij e drejta për të blerë tokë, ku t’i teket në Maqedoni dhe jashtë saj, sepse konkurrenca e lirë dhe tregu i hapur këto përparësi ka, por kur bëhet fjalë për një copë hapësirë që është shndërruar në vend-pelegrinazhi për qindra mijëra e miliona njerëz nga mbarë bota, atëherë investitori ka qenë dashur të paktën të rishqyrtojë planin e tij (nëse veç ka pasur ndonjë plan) dhe në bashkëpunim me shoqërinë civile dhe institucionet relevante në Shkup të mendojë për rindërtimin e shtëpisë së lindjes së Nënës Terezë, sipas të njëjtës pamje dhe të njëjtës arkitekturë.
Sigurisht që në ditët në vijim mund të kemi edhe ndonjë sqarim plotësues të investitorit nga Tirana, mbi këto hamendësime, të cilat do të merrnin një përfundim objektiv, nëse qartësohet ideja përfundimtare e tij rreth qëllimit dhe destinimit të investimit të tij në hapësirën që tash më po kontestohet edhe në rrugë gjyqësore.
Deri në sqarimin e radhës, në opinion publik nuk do të mungonin pyetjet e stilit: Çfarë pallati 20 katësh do të mund ndërtohej aty dhe sa ky projekt do të rrezikonte kontinuitetin e në tradite, siç është shtëpia e Bojaxhinjve, aty ku lindi Gonxhe Bojaxhiu?
Qyteti i Shkupit, tash së fundmi është deklaruar se do të bllokojë procesin e privatizimit të kësaj hapësire. Kryetari Petre Shilegov para tre ditëve tha se aty nuk mund të ndërtohet asgjë, derisa ai do të jetë kryetar i qytetit të Shkupit, por në anën tjetër ai ka lejuar të ndodhë një krim tjetër, jo vetëm urbanistik, por edhe civilizues, pikërisht në vendin ku para më shumë se dhjetë viteve zhvillohen beteja grueviste për ndërtimin e një kishe ortodokse maqedonase.
Ndërkohë që, të gjitha këto kontestime e paqartësi po ndodhin pa nxitur kurrfarë reagimi ana e faktorëve politikë e institucional shqiptar në Shkup!
Gazeta Koha
