Voton edhe deputetja Mesila Doda: Surpriza e zgjedhjeve të radhës do të jetë PDIU
Kryetari i PDIU-së, Shpëtim Idrizi dhe deputetja e kësaj partie, Mesila Doda, votuan sot në qendrën e votimit në selinë qendrore në Tiranë. Kandidati për kryetar, Halil Hyseni ka votuar gjithashtu sot në selinë qendrore të PDIU-së. Mbi 24 anëtarët e PDIU-së janë duke votuar në të gjitha degët e vendit për zgjedhjen e kryetarit të PDIU-së dhe krerëve të kësaj partie në rrethe.
Menjëherë pas votimit, z.Shpëtim Idrizi u shpreh se PDIU ka ambicje të mëdha për të dyfishuar mandatet. Ai theksoi se ky proces tregon demokracinë e brendshme që ndihmon në arritjet e PDIU-së.
“PDIU ndodhet në një moment shumë të rëndësishëm të organizimit të saj të brendshëm. Sot 24 mijë anëtarë të PDIU-së në të gjithë Shqipërinë po votojnë për drejtuesit e tyre, për kryetarin e partisë, për kryetarin e partisë në bashki dhe për delegatët në kongres, i cili do të mbahet në datën 4 qershor. Ne vijmë pas një rrugëtimi 2-mujor, në kontakt me anëtarësinë në çdo rreth të Shqipërisë. Sigurisht ishte një proces shumë i rëndësishëm për ne, për të takuar mbështetësit dhe anëtarët e PDIU-së, për të kulmuar në ditën e sotme. Ne po krijojmë një demokraci të brendshme për herë të parë, duke ju përgjigjur ndarjes së re territoriale. Ne po krijojmë të gjithë infrastrukturën tonë partiake, sepse PDIU me numrin e ri të anëtarësisë sa saj, është një parti e cila ka ambicje të mëdha elektorale, në garën e ardhshme parlamentare, për t’i dyfishuar mandatet tona. Kjo demokraci që ne po bëjmë sot do të na ndihmojë në arritjet e rezultateve. Falenderoj z.Halil Hyseni për praninë e tij në garë. Ne bëmë një dëgjesë publike për herë të parë në Shqipëri, ku shpallëm platformat tona, para anëtarësisë së PDIU-së. Ky proces ka filluar në të gjithë Shqipërinë njëkohësisht. Besoj është një ushtrim i mirë demokracie për PDIU-në dhe për të gjitha partitë e tjera”, u shpreh z.Idrizi pas votimit.
Deputetja Mesila Doda tha se ky proces ka qenë një fytyrë tjetër e realitetit të politikës shqiptare.
“Besoj së është një shembull demokracie e brendshme në një parti, se si duhet të funksjonojë. Procesi është mjaft i rregullt dhe është hapur në të gjitha degët e PDIU-së, në të gjithë Shqipërinë. Një pjesmarrje masive, e cila tregon mbështetjen që po na japin anëtarët e rinj, por edhe anëtarët e vjetër, të cilët na kanë shoqëruuar përgjatë gjithë kohës. Besoj se është një shembull për t’u marrë, por edhe një fytyrë tjetër e relitetit të politikës shqiptare, e asaj që ka të bëjë me garën, me konkurrencën, jo me armiqësinë, jo me intrigën, jo me urrejtjen midis nesh. Besoj se surpriza e radhës në zgjedhjet e ardhshme do të jetë PDIU. Është hera e parë që unë votoj tek PDIU. Besoj dhe shpresoj që do jem me mbarësi dhe do kemi mundësi që të kemi rezultate shumë të mira. Janë njerëz që i kam njohur përgjatë gjithë kësaj kohe. Nuk ka pasur tensione negative përgjatë garës, qoftë ato për delegatë, qoftë ato për kryetarë të PDIU-së. Është një garë shumë dimensionale, ku do të zgjidhen kryetarët e partisë në rrethe, por edhe kryetari i PDIU-së”, tha znj. Mesila Doda.
Ndërsa kandidati tjetër për kryetar të PDIU-së, z.Halil Hyseni tha se kjo parti është e hapur për cilindo.
“E veçanta që unë mund të shtoj është zgjerimi i PDIU-së. Fakti që unë jam sot në garë, është shprehje e zgjerimit të PDIU-së dhe mundësive që PDIU ofron, jo vetëm për themeluesit e saj, por edhe për të ardhurit, siç jam edhe unë. Dera e PDIU-së është e hapur për cilindo, jo vetëm për t’u promovuar por edhe për të punuar në të gjitha nivelet e saj”, u shpreh z.Halil Hyseni.
