Kandidati i së majtës për Bashkinë e Peshkopisë, Muharrem Rama ka nisur fushatën e tij elektorale duke u takuar me qytetarët.
Bashkë me të ka qenë kordinatori i Kryesisë së Partisë Socialiste për Qarkun e Dibrës, ministri i Energjisë dhe Industrisë z. Damian Gjiknuri. Duke ju drejtuar qytetarëve, ministri Gjiknuri tha se Partia Socialiste zgjodhi një njeri që jeton me hallet e njerëzve.
Gjiknuri: Ndryshe nga forca tjetër politike, ne nuk duam të sjellim figura të ricikluara politike që e thonë vet se janë afër pensionit por na kërkon partia për interesat e saj. Ne duam që qytetarëve të Dibrës tu japim njeriun që meritojnë, tu japim djalin e tyre dhe njeriun që i ka shërbyer popullit.
Unë them se qytetarët e Dibrës, më shumë se sa një politikan që vjen thjesht për interesa politike, kërkojnë një njeri që jua di hallet, ka jetuar me hallet e tyre e që do vazhdojë të jetojë në këtë qytet.
Sipas tij, me Muharem Ramën kryebashkiak, Dibra do të ketë mbështetjen e qeverisë shqiptare për të çuar përpara e bërë realitet investimet që kanë nisur e që do të vazhdojnë.
Gjiknuri: Kjo do të jetë fushata e qytetarëve, qytetarët le të vendosin: kanë këtu djalin e tyre që i ka shërbyer popullit; kanë dhe njerëz që kanë ikur, kanë bërë punët e tyre në Tiranë dhe tani vijnë tu kërkojnë votat për të ju gënjyer siç ju kanë gënjyer tash e 20 vjet.
Gjithashtu Ministri Gjiknuri dhe kandidati Rama realizuan edhe një takim me banorët e Maqellarës me të cilët diskutuan për problematikat e këtij komuniteti.
