Presidenti Ilir Meta, ka ftuar kreun e PDIU, Shpëtim Idrizin në Presidencë për nisjen e konsultimeve rreth caktimit të datës për zgjedhjet e ardhshme parlamentare të vitit 2021.
Presidenti në letrën e tij ka ftuar Idrizin apo persona të tjerë të caktuar prej tij, që të jenë të pranishëm ditën e premte datë 4 në Presidencë.
“Presidenti i Republikës, Ilir Meta në mbështetje të kompetencave të tij Kushtetuese, neni 90 gërma “gj”, pas hyrjes në fuqi të ndryshimeve konsensuale në Kodin Zgjedhor të miratuara në ligjin nr. 101/2020, si dhe në vijim të traditës së mirë, ka vendosur nisjen e procesit të konsultimeve me partitë politike me qëllim caktimin e datës së zgjedhjeve të ardhshme për Kuvendin e Republikës së Shqipërisë. Për këtë, Presidenti i Republikës fton në takim ditën e premte datë 04.09.2020 ora 09:30 pranë Institucionit të Presidentit të Republikës, Kryetarin e Partisë Drejtësi Integrim dhe Unitet, dhe/apo persona të tjerë të autorizuar prej tij. Me besim në vlerësimin e këtij procesi të rëndësishëm”, shkruhet në ftesë.
