Në Shqipëri deklaratat e policisë dhe prokurorisë mbi përplasjen e armatosur në Elbasan më 21 prill, në prag të zgjedhjeve, ku pati një të vrarë dhe 4 të plagosur, ngjanin të ishin kontradiktore me provat e gjetur në vendin e ngjarjes, mes të cilave lista me emra dhe fotokopje kartash identiteti. Prokuroria shpjegon se ato nuk mund të konsiderohen materiale zgjedhore. Burime të “Zërit të Amerikës” bënë të ditur megjithatë se verifikimet po shtrihen edhe mbi dyshimet e mundshme për krime zgjedhore.
Zanafilla e konfliktit të armatosur më 21 prill në qytetin e Elbasanit, i cili përfundoi me një të vrarë dhe katër të plagosur në prag të zgjedhjeve parlamentare, erdhi pasi disa mbështetës të Partisë Demokratike, pjesë e të ashtuquajturit “Grupi i Mbrojtjes së Votave”, ndaluan Mehmet Grecën, një person i dënuar për trafik droge në Britani, i cili, sipas tyre, po shpërndante para në favor të fushatës së Partisë Socialiste.
