Në Fletoren Zyrtare është botuar më datë 8.5.2020 (sot) një Vendim i Këshillit të Ministrave kalimi në pronësi të Bashkisë së Tiranës Teatrit Kombëtar, një godinë e cila tre vitet e fundit ka shkaktuar një përplasje të ashpër në jetën politike dhe jo vetëm në Shqipëri.
Këshilli i Ministrave me vendimin numër 377 të datës 08.05.2020, i ka kaluar në pronësi Teatrin Kombëtar Bashkisë së Tiranës.
Vendimi është publikuar sot, ndërsa Bashkisë i kërkohet të ndërtojë një godinë bashkëkohore për Teatrin Kombëtar, të konsultohet me grupet e interesit dhe i ndalohet të ndryshojë destinacionin e kësaj pasurie.
“…me propozimin e ministrit të Kulturës, Këshilli i Ministrave VENDOSI:
1. Kalimin në pronësi të Bashkisë Tiranë, të pasurisë nr.1/241, me emërtimin “Teatri Kombëtar”, në zonën kadastrale 8150, Tiranë, me sipërfaqe totale 5 522.7 (pesë mijë e pesëqind e njëzet e dy pikë shtatë) m2, me adresë: rruga “S. Toptani”, Tiranë, me qëllim ndërtimin e një godine bashkëkohore dhe me standarde të Teatrit Kombëtar, në konsultim me të gjitha grupet e interesit, sipas hartës kadastrale që i bashkëlidhet këtij vendimi dhe është pjesë përbërëse e tij.
2. Bashkisë Tiranë i ndalohet të ndryshojë destinacionin e pasurisë së përcaktuar në pikën 1, të këtij vendimi, ta tjetërsojë atë apo t’ua japë në përdorim të tretëve”, thuhet ndër të tjera në vednimin e Këshillit të Ministrave.
