Është zbardhur vendimi i plotë i Gjykatës së Posaçme të Apelit për rikthimin për rigjykim të dosjes së ish-ministrit të brendshëm, Saimir Tahiri.
Gjykata e cilëson si jopërfundimtar vendimin që është marrë në Katania të Italisë pasi nuk plotëson kushtet.
Në vendim thuhet dhe se në rastin e gjykimit të ish-ministrit dhe ish-drejtorit të Policisë së Vlorës janë shkelur dispozitat për paraqitjen e akuzave të reja.
Vendimi i plotë
Ky kolegj vlerësoi të pabazuar shkakun e pretenduar nga i pandehuri Saimir Tahiri në lidhje me zbatimin e parimit bis in idem në rastin konkret. Ky kolegj i gjykatës së Posaçme të Apelit çmoi se vendimi i marrë nga gjyqtari për hetimet paraprake të Katanias Itali nuk plotëson kushtet për t’u cilësuar vendim përfundimtar në repsektim të nenit 34 të Kushtetutës së Republikës së Shqipërisë si dhe në referim të jurisprudencës së Gjykatës Kushtetuese.
Ky kolegj duke shqyrtuar në themel faktet e arbitruara të të pandehurve Saimir Tahiri dhe Jaeld Çela në raport me aktin e njoftimit të akuzës dhe kërkesës për dërgimin e çështjes në gjyq të prokurorisë në raport me vendimin e gjyqtarit të seancës paraprake, si dhe në raport me konlukizionet e arritura nga vendimi i apeluar vlerësoi se në rastin konkret janë shkelur dispozitat për paraqitjen e akuzave të reja e lidhur kjo edhe me mos respektimin e dispozitave për ushtrimin e ndjekjes penale nga prokurori.
Gjykata për Krime të Rënda në vlerësimin e këtij organi e ka zbatuar gabim nenin 375 të K. Pr. Penale sepse në këtë akt gjykata nuk ka rivlerësuar të njëjtin fakt të atribuar nga prokuroria e të pandehurve, por de facto ka ngritur një akuzë të re për të cilën të pandehurit Tahiri dhe Çela nuk janë hetuar për “kultivimi i lëndëve narkotike dhe përhapja e kultivimit të lëndëve narkotike në Shqipëri”. Në lidhje me këto episode dhe kultivimin e lëndëve narkotike prokurorët janë shprehur se nuk kanë ngritur asnjë akuzë, por janë referuar për të mbështetur ekzistencën dhe qëndrueshmërinë e grupit të strukturuar kriminal pjesë e të cilit akuzohen dhe dy të pandehurit.
Gjykata për Krime të Rënda ndonëse e vlerëson si kontradiktor këtë qëndrim të prokurorisë, duke iu referuar pikërisht këtyre episodëve që lidhen me sekuestrimin dhe asgjësimin e bimëve narkotike në vitet 2016-2017 rikualifikon faktin penal të atribuuar ndaj të pandehurve në lidhje me trafikimin e lëndëve narkotike duke e cilësuar shpërdorim detyre.
