Pamjet që shihni në poshtë janë xhiruar vetëm disa minuta më parë në sheshin Skënderbej, ku situata politike duket se është reflektuar dhe në një ditë historike si kjo e sotmja, ku finalizohet stërvitja e përbashkët ushtarake ‘Defender 2021’, në një ditë të hapur për qytetarët.
Të pranishëm në këtë takim janë presidenti i vendit Ilir Meta, kryeministri Edi Rama dhe ambasadorja Yuri Kim si dhe drejtues të lartë të ushtrisë shqiptare dhe ministra të qeverisë. Ajo që bie në sy është ambasadorja amerikane Yuri Kim, e cila ngrihet nga karrigia për ti dhënë dorën Edi Ramës, teksa ky mbërrinte i fundit në shesh.
Ndërkohë që me një shikim të kujdesshëm, vihet re se nuk pati një takim kortezie mes Kim dhe presidentit Meta, apo presidentit dhe kryeministrit. Prej ditësh situata mes presidentit dhe Yuri Kim mbetet e tensionuar, teksa kreu i shteti e akuzoi diplomaten amerikane për ndërhyrje në punët e brendshme, ndërsa përplasja ka kulmuar në një reagim te Metës pas shpalljes “non grata” të Berishës, që u konsiderua një sulm ndaj DASH.
