Botuesi i gazetës kombëtare “Bota sot”, Xhevdet Mazrekaj, nëpërmjet një postimi në faqen e tij në facebook, ka publikuar një fotografi të Baton Haxhiut, me tre gishtërinj të ngritur përpjetë, ndërsa ka shpjeguar edhe historinë e kësaj fotografie.
Mazrekaj në shkrimin e tij, ka rrëfyer se si për fotografinë, ku Baton Haxhiu shihet duke bërë simbolin famëkeq serb të ngritjes së tre gishtërinjve, kishte paguar gjobë 10 mijë euro.
Ai ka shpjeguar që fotografia e Haxhiut ishte bërë në një media serbe, ku ky i fundit ishte mysafir.
Publikimi i kësaj fotografie Mazrekajt, “i kishte kushtuar” asgjë më pak se 10 mijë euro. Ndërsa, ka treguar që vendimi i gjykatës, kishte ardhur si pasojë e ndërhyrjes në drejtësi të sigurimit serb.
Shkrimi i plotë i Xhevdet Mazrekajt:
Për tre gishtat e Baton Haxhiut pagova gjobë 10 mijë euro
Personi në fotografi është Baton Haxhiu. Ishte i pranishëm si mysafir në një media serbe kur kishte bërë simbolin famëkeq të serbëve për shqiptarët, ngritjen e tre gishtërinjve.
Këtë fotografi deshën ta censurojnë në Serbi, me qëllim që të mos kuptohej se Batoni punonte për ta.
Mirëpo, “Bota sot” , e kishte publikuar këtë fotografi. Për publikimin e saj ishte gjobitur me 10 mijë euro nga drejtësia në Prishtinë e cila ishte nën mbikëqyrjen e UNMIK-ut.
Kujtoj se për këtë rast, kisha avokate zonjën e nderuar, tashmë të ndjerë, Nekibe Kelmendi.
Ajo vinte shpesh në Zvicër për t’u konsultuar me mua për procesin gjyqësor që zhvillohej në Prishtinë.
Kur përfundoi rasti dhe u mor vendimi i lartpërmendur, e pyeta zonjën Kelmendi se si është e mundur të gjobitemi për diçka që ka qenë reale dhe publike. Madje, i tregoja se këtu në Zvicër avokatët dhe ekspertët ligjor po habiten dhe me vendimin e drejtësisë së UNMIK-ut dhe po e konsiderojnë si absurd.
E ajo mu përgjigj: “S’ka këtu të bëj me drejtësi, kështu ka vendosur sigurimi serb, që ju të gjobiteni”.
Pra, me fjalët e zonjës Kelmendi nënkuptohej që në drejtësinë tonë kishte të interferuara edhe shërbime serbe, të cilave iu shërbente Baton Haxhiu.
Ato nuk donin të “dekonspironin” bashkëpunëtorin e tyre.
Është e neveritshme e për më tepër është dëshpëruese se si Baton Haxhiu mik me kryeudbashin Jovica Stanishiq, sot është i privilegjuari i Presidentit, kryeministrit dhe shumë figurave të tjera të jetës politike në Kosovë.
