Presidenti i Serbisë, Aleksander Vuçiç, ka reaguar lidhur me premtimet e dhëna të Albin Kurtit të cilat ndërlidhen me Serbinë dhe dialogun.
Në një intervistë të dhënë për mediat serbe, sa i përket premtimeve të Kurtit, Vuçiç thotë se “gjërat nuk janë aq të thjeshta sikur je në opozitë dhe fletë pa përgjegjësi”.
Vuçiç shprehet se nuk mund të ketë reciprocitet pasi që Serbia nuk e njeh Kosovën si shtet, por lajmi për heqje të taksës Vuçiç i sheh si lajme të mira, pasi sipas tij një vendim i tillë i ka shkaktuar dëme të mëdha Serbisë.
“Është mirë që po e konsideron heqjen e taksës, do të ishte mirë të bisedonim në të ardhmen. Kjo është diçka që pritet, Kurti është duke përparuar në pozitën e tij politike në arenën ndërkombëtare”, ka thënë Vuçiç.
Sa i përket mundësisë së uljes në tavolinën e negociatave me Kurtin, Vuçiç ka thënë se nuk përcakton Beogradi se me kë ulet në tavolinë, pasi që populli në Kosovë zgjedh përfaqësuesit e tyre.
Teksa ka folur për paralajmërimin e Kurtit për ligjin për gjenocidin, Vuçiç thotë se është një mashtrim i cili nuk mund të frikësojë Serbinë.
Në fund kreu i shtetit serb ka folur edhe për situatën e sigurisë. Vuçiç thotë se është i lumtur që në 8 vjetët e fundit nuk ka pasur ndonjë incident apo konflikt në baza nacionale./Express/
