Është qëlluar me armë zjarri dhe më pas ka ndërruar jetë në spital, polici i Forcave të Ndërhyrjes së Shpejtë, Ardian Kodra. Ai mbeti i plagosur në Lezhë pak minuta më parë gjatë një shkëmbimi zjarri me një person të armatosur. Nga të dhënat e deritanishme rezulton se autori i ngjarjes dyshohet se është person me problem mendore. Ngjarja ka ndodhur në Torovicë të Lezhës, ku shtetasi David Qosja, ka qëlluar me automatik në drejtim të Forcave të Ndërhyrjes së Shpejtë. Pasi ka qëlluar me armë në drejtim të policiës, autori është mbyllur në banesën e tij i armatosur.
Fillimisht u raportua në polici se shtetasi Qosja, ka qëlluar me automatik në ajër, ndërsa Forcat e Ndërhyrjes së Shpejtë u nisën menjëherë drejt vendit të ngjarjes. “Shtetasi David Qosje, njihet në zonë si person me probleme mendore, por nuk ka asgjë të vërtetuar me dokumenta nga Spitali. Ky shtetas është mbyllur në banesën e tij i armatosur. Forcat policore kanë bërë rrethimin e banesës dhe po veprojnë për neutralizimin dhe kapjen e tij, por autori ka gjuajtur me armë zjarri në drejtim të forcave policore”, sqaron policia lokale.
“Nga shkëmbimi i zjarrit, ka mbetur i plagosur një efektiv policie i F.N.SH-së Shkodër”, thuhet më tej.
