Kreu i Partisë Demokratike, Lulzim Basha në vijim të takimeve me qytetarët ka udhëtuar sot drejt Malësisë së Madhe.
Gjatë bisedës me Bashën, një pronar biznesi në Koplik u shpreh se pas vrasjeve të ndodhura kohët e fundit, qyetarët kanë frikë të dalin në rrugët e qytetit.
“Ne kemi frikë në Shkodër me dalë me pi kafe.”- shprehet banori.
Ndërkohë Basha akuzoi se mungesa e drejtësisë ka çuar shqiptarët drejt dëshpërimit. Ai u shpreh se kjo qeveri po zhvat bizneset në mënyrë që ata të braktisin vendit e tyre nga mungesa e prespektivës.
Basha u ndal në biznesin e tregtarit Gazmend Fili, i cili deklaroi se për 3 vite janë larguar shumë njerëz, teksa pretendon se edhe në gjimnaz aktualisht ka 350 nxënës më pak.
Lulzim Basha: Hera e parë që vij këtu tek ti. Sa kohë ke që e ke hapur këtë dyqan?
Tregtari Gazmend Fili: Që në 2010. Të punësum kam pasë para 3 viteve, por tani e largova, se s’kam me i pagu rrogat e sigurimet.
Jena në një situatë që para 3 viteve, gjimnazi ka pasë 700 nxënës, sot 350. Përveç krizës së nxënësve, është edhe kriza shpirtërore. Janë duke ikur edhe familjarët, jo vetëm të rinjtë. Jam 30 vjeç, me diplomë e nuk shoh asnjë perspektivë.
Situatë është e vështirë, por me ndihmën e Zotit, shpresoj të bëhet më e mira.
Basha: Me ndihmën e Zotit, por edhe me punën e njerëzve të ndershëm. Por është e vështirë, sepse tani nga 1 apo 2 taksa, paguani 5-6 taksa e tarifa. Edhe niveli i taksave është shtuar. Kemi represion shtetëror mbi biznesin. E dyta, gjithçka që mund të shesim, e kanë uzurpu vetëm 2 njerëz. Gjithçka shkon në duart e këtyre dy njerëzve. Me këto goditje, do ishte shkatërruar ekonomia gjermane, jo ekonomia jonë. Kjo situatë përcillet tek e gjithë ekonomia. Familjet zhyten në borxh e detyrohen të emigrojnë. Prandaj duhet çlirim, ndryshim i madh dhe ta përqafojmë të gjithë këtë ndryshim. Jo vetëm PD, por edhe biznesi i vogël, të gjithë. Ky sistem duhet shembur. Duhet shembur sistemi, pasi Rama është i rënë, ai i pari e di këtë.
