Flamurtari ishte një uragan, ashtu siç nuk e kemi parë prej kohësh dhe duhet pasur parasysh që përballë kishin Skënderbeun, skuadra që në ato 90 minuta u kthye në fare e zakonshme. Që në të 8’, pas një pasimi të artë të Alvesh, Donet Shkodra e dërgon topin në rrjetë, për të pestën herë gjatë këtij sezoni. Dhe që nga ai moment, pothuajse e njëjta melodi gjatë të gjithë ndeshjesh. Alvesh shpërdoron shumë, por Flamurtarit i është kthyer një futbollist shumë i rëndësishëm, ndërsa në të 37’, pas një harkimi të Arbër Beqirajt është Bushiç që shënon sërish, këtë rradhë pa pasur reagimin të asnjë prej mbrojtësve korçar.
Ndërkohë që Agostineli vazhdon të eksperimentojë edhe tani që pothuajse ia kanë prenotuar biletën e kthimit. Trajneri italian ka preferuar Agim Zekën titullar dhe 18 vjeçari tregoi se ka të ardhme të garantuar, por ndërkohë nuk ishte sërish në fushë, as Serzhinjo dhe as Xhejms, për të ndihmuar Salihin. Edhe sot sulmuesi shkodran ishte si i izoluar në një ishull, ndërsa Skënderbeu nuk ka më asnjë ngjashmëri me skuadrën kampione të sezoneve të fundit.
Rezultatet/ Java X
Laçi – Korabi 1-0
Partizani – Luftëtari 1-1
Flamurtari – Skënderbeu 2-0
Nesër
Kukësi – Vllaznia
Tirana – Teuta
