Ambasadorja e BE-së: Nëse do të zbatohet siç duhet do të sjellë standardin e BE dhe një sistem të drejtësisë funksional që nuk varet nga politika e përditshme
Ndërsa ambasadori i SHBA-së ishte i prerë dhe me mesazh të drejtpërdrejtë ndaj politikës, ambasadorja e BE-së Romana Vllahutin, duket më optimiste. Ajo mendon se janë lënë pas mosmarrëveshjet mes palëve në politikën shqiptare dhe se reforma është drejt përfundimit. Në fjalën e saj në komisionin e reformës në drejtësi, Vllahutin u përqëndrua tek të mirat që i vijnë Shqipërisë nga kjo reformë.
“Ne jemi në një pikë kur procesi duhet të hyjë në fazën përfundimtare për të harmonizuar detajet e fundit dhe në mënyrë përfundimtare miratimi i saj në Parlament sa më shpejt të jetë e mundur. Ka pasur pengesa në këtë rrugë kryesisht politike, shumë keqkuptime, mungesë komunikimi e mbi të gjitha mungesë besimi, por të gjitha këto i kemi lënë pas tashmë. Madje guxoj të them se nuk janë më të rëndësishme.
Ajo që është e rëndësishme të them është e ardhmja e Shqipërisë. Më lejoni tju them se nga këndvështrimi i BE-së, se çfarë sjell kjo reformë për Shqipërinë: 1- Nëse do të zbatohet siç duhet do të sjellë standardin e BE dhe një sistem të drejtësisë funksional që nuk varet nga politika e përditshme. Do të sjellë një sistem të pastër nga ata që e kanë abuzuar, shfrytëzuar atë, përfituar, mbrojtur krimin, toleruar në vend që ta ndëshkonin”, tha Vllahutin.
