Rreth 1320 pallate do të përfitojnë lejet e legalizimit për shtesat anësore ose në lartësi të cilat janë ndërtuar pa leje nga ndërtuesit e objekteve shumëkatëshe
Këshilli i Ministrave ka miratuar këtë projektvendim të hartuar nga ministria e zhvillimit urban i cili përcakton rregullat për legalizimin e këtyre objekteve.
Ministrja Eglantina Gjermeni në deklaratën e saj pas mbledhjes së qeverisë, tha se përfitues janë 26-30 mijë familje në të gjithë vendin. Sipas Gjermenit vetëm gjatë dy viteve të fundit janë kryer 90 mijë legalizime, 5 herë më shumë se në 8 vitet që lamë pas.
Gjermeni: “Në të gjithë vendin numërohen rreth 1 320 pallate që preken nga ky vendim, 700 prej të cilave janë në territorin në administrim të Bashkisë së Tiranës. Këto familje, edhe pse e kanë blerë pronën në mirëbesim, nuk janë bërë pronarë, për shkak të mospërmbushjes së detyrimeve ligjore nga ana e ndërtuesve.”
Këtë vendim e ka kundërshtuar ministri i Drejtësisë Ylli Manjani, i cili argumentoi se kjo nismë ka përqasje me kompetencat e ALUZINIT me pushtetin vendor dhe mbart borxhet nga ndërtuesit tek blerësit gjë e cila shkakton konflikt dhe nuk garanton kontrollin mbi territorin.
