Kandidatja për kryeministre nga radhët e LDK-së Vjosa Osmani, zgjidhet kryetare e re e Kuvendit të Kosovës.
Seanca e jashtëzakonshme plenare ka nisur në orën 19:00 të mbrëmjes së sotme për të zgjedhur kryeparlamentarin e ri pasi Glauk Konjufca i Vetëvendosjes i emëruar një muaj më parë dha dorëheqjen në kuadër të marrëveshjes LDK-VV. Ai do të mbajë postin e Ministrit të Jashtëm.
E proprozuar në postin e kryetares nga deputetja e Vetëvendosjes Fatmire Kollçaku, Vjosa Osmani ka marrë 65 vota pro dhe do të jetë kështu kryeparlamentarja e re e Kosovës.
Vota kundër dhe abstenim nuk ka pasur.
“Është nder shumë i madh që me besimin tuaj të zgjedhem që të drejtoj Kuvendin e Kosovës, instucionet më të lartë për katër vitet e ardhshme. Natyrisht përkundër faktit që kjo seancë po mbahet në mbrëmje, falënderoj mediat për durimin diplomatik.
Falënderimi më i madh i takon secilit qytar të Kosovës që asnjëherë nuk rreshti së besuari se vota e tyre është ajo që do ta sjellë ndryshimin e madh në Republikën tonë”.
Për kohën dhe sfidat përpara, të jemi një Kuvend që do të mbikëqyrë. Ajo që mund të them është se do ta keni përkrahjen e plotë në detyrat që janë të shenjta sepse vullneti më 6 tetor ka qenë i shenjtë. E kemi për detyrë që fjalët e dhëna t’i jetësojmë dhe t’i çojmë deri në fund. Do t’ia kthejmë dinjitetin Kuvendit edhe për shkak të kualitetit që e shoh në grupet parlamentare”, ka thënë Vjosa Osmani, ndërsa ka mbyllur dhe seancën e parë të Kuvendit.
