Gjatë seancës plenare ditën e sotme, Kryeministri Edi Rama ka folur në lidhje me masat e marra dhe ndryshimet ligjore që janë propozuar në lidhje me ndërtimet, duke marrë shkas nga pasojat që shkaktoi tërmeti i 26 nëntorit të vitit të shkuar.
“Ministrja foli, sigurisht që është i rëndësishëm dhe përmban disa elementë të nevojshëm që mungonin në bazën ligjore ekzistuese po përtej këtij ligji ajo që dua të nënvizoj është nevoja për të plotësuar këtë bazë edhe si reflektim pas tragjedisë së 26 nëntorit. Këtu kam parasysh edhe reflektimin e atyre që kanë penguar edhe në këtë sallë ndryshimet.
Ky në fakt është fenomeni më i shëmtuar dhe më i rrezikshëm që ka shoqëruar Shqipërinë në aspektin e sigurisë, hapësirës urbane dhe shëmtisë që ka karakterizuar në vijim degradimin e procesit nga leja e ndërtimit te zbatimi i saj.
Po të bënim një ekspozitë të projekteve që miratohesh dhe projekteve që janë zbatuar do kishim dy botë të ndryshme.
Ju siguroj se një pjesë e madhe e ndërtesave nuk kanë lidhje fare me lejet e miratuara jo vetëm në aspektin e cilësisë por edhe në volum dhe formën e tyre.
Nëse do ishin zbatuar projektet e miratuara do kishim pas 30 vjetësh qyttete shumë më cilësore në pikëpamje të urbanistikës dhe arkitekturës.
Ajo që ka ndodhur historikisht dhe që ka sjellë situatën e papranueshme të pamundësisë së zotërimit të pronës së tyre është tejkalimi i të gjithë kornizës së lejes së miratuar.
Faktikisht në një masë të patolerueshme rastesh ajo që nisa me miratimin e lejes është një trup që pastaj shfaqet i stërzmadhuar në realitet nga shkelja e ligjit.
Pse nuk ka funksionuar kontrolli mbi ndërtimet e ligjshme në nisje që në fund kanë rezultuar të paligjshme.
Nuk mund të funksionojë kontrolli mbi lejet e ndërtimit nëse nuk ka përgjegjësi penale për të gjithë zinxhirin që do të thotë se arkitektët nuk mund të dorëzojnë projektin dhe të ikin, arkitektët duhet të firmosin në fund. Konstruktorët nuk mund të mos mbajnë përgjegjësi penale kur leja është për 5 kate dhe jashtë lejes bën një objekt me 8 kate.
Është e gjitha e paligjshme dhe shkon deri në kriminale kur familjet që paguajnë për të marrë një apartament nuk marrin dot mbrapsht hipotekën. Leja e shfrytëzimit, të gjithë punonjësit e bashkisë të jenë të kujdesshëm sepse do ti thonë burgut hapu nëse nuk zbatojnë kushtet për ndërtimin”, tha Rama.
